لاہور(پاکستان پوائنٹ نیوز06۔دسمبر2017ء) سماجی کارکن منیبہ مزاری نے خاوند ولوں دائر کیتے جان والے ہتک عزت دے دعوے بارے گل بات کردے ہوئے مائیکرو بلاگنگ ویب سائٹ ٹویٹر اُتے اپنے پیغام وچ آکھیا کہ مینوں میڈیا راہیں اپنے خلاف دائر کیتے گئے کیس دا پتا چلیا اے۔ اوہناں نے آکھیا کہ مینوں اجے تیکر کوئی عدالتی یاں طلبی دا نوٹس نہیں ملیا پر میں اپنے وکیل نوں ایس سلسلے وچ ہدایتاں جاری کر دتیاں نیں۔
اک سوشل میڈیا ورتیندڑ نوں جواب دیندے ہوئے منیبہ نے لکھیا کہ میں ایس بندے توں چنگی آس نہیں کر سکدی۔ میں خش آں کہ ایہ بندہ میری زندگی دا حصہ نہیں اے۔ پیسیاں لئی اوہدی لالچ دی کوئی حد نہیں اے ۔ میں انشاء اللہ ہمیشہ وانگ ہن وی باوقار طریقے نال لڑاں گی۔یاد رہوے کہ منیبہ مزاری دے سابق شوہر نے اوہناں اُتے ہتک عزت دا دعوا کردے ہوئے الزام لایا اے کہ اوہناں نے اپنی تقریر وچ اوہناں خلاف بیان دے کے اوہناں دے خاندان نوں بدنام کرن دی کوشش کیتی اے۔
