اسلام آباد(پاکستان پوائنٹ نیوز05۔دسمبر2017ء) نجی ٹی وی چینل دے پروگرام وچ گل بات کردے ہوئے سینئر پرچاکار چودھری غلام حسین نے آکھیا کہ پنجاب دے وزیر قانون رانا ثناء اللہ بارے ملک دیاں جماعتاں، سیالوی گروپ تے ختم نبوت دے گروپاں نے مطالبہ کیتا اے کہ اوہناں نوں عہدے توں ہٹا یا جائے۔ کیونکہ اوہناں نے بے ہودہ بیان دِتے نیں تے اگانہ جا کے اک اقلیت بارے گلاں کیتیاں نیں۔
ایس لئی رانا ثناء اللہ معافی منگن تے کلمہ پڑھن تے پنجاب حکومت اوہناں دا استعفا دوائے۔ رانا ثناء اللہ دے استعفے لئی حکومت نوں تن دسمبر دی مہلت دتی گئی سی پر وزیر اعلا پنجاب شہباز شریف نے تھوڑی ہور مہلت لئی اے جدکہ نواز شریف تے شہباز شریف وچکار رانا ثناء اللہ دے معاملے اُتے اک جھیڑا کھڑا ہو گیا اے۔ وزیر اعلا پنجاب شہباز شریف نے میاں محمد نواز شریف نوں ایہ تجویز دتی اے کہ رانا ثناء اللہ استعفا دے دین تے اوہناں نوں عہدے توں ہٹا دتا جائے۔
پر ایہدے اُتے میاں نواز شریف نے آکھیا اے کہ میں رانا ثناء اللہ نوں کسے قیمت اُتے عہدے توں نہیں ہٹاواں گا۔ رانا ثناء للہ ورگا وفادار،قربانی دین والا، بُرے ویلے وچ ساتھ دینا والا پنجاب بھر وچ ہور کون اے؟ میں کسے صورت اجیہا نہیں ہون دیواں گا۔ پہلے وی زاہد حامد دا استعفا غلط دوایا اے۔ شہباز شریف نے نواز شریف نوں ایہ وی آکھیا اے کہ اوہ رانا ثناء اللہ نوں سینٹرل ایگزیکٹو کمیٹی دا ممبر نہ بنان، کیونکہ ملک دیاں دینی طاقتاں احتجاج کر رہیاں نیں تے پورا ملک اوہناں دے نال اے۔
شہباز شریف دی ایس گل اُتے وی نواز شریف نے انکار کیتا تے آکھیا کہ میں عابد شیر علی نوں بنایا اے تے رانا ثناء اللہ نوں وی بناواں گا۔ شہباز شریف نے نواز شریف نوں آکھ دتا اے کہ ہن ایہ صورتحال ہو گئی اے کہ ساڈا سیاسی جنازہ نکلے گا۔ تُسیں رانا ثناء اللہ نوں بچان تے شہباز شریف دی قربانی دین لئی تیار ہو جاؤ۔
