اسلام آ باد(پاکستان پوائنٹ نیوز02۔دسمبر2017ء) پاکستان دے سابق آرمی چیف جنرل (ر) راحیل شریف نے اپنے زمانے وچ بہادری دیاں کئی مثالاں قائم کیتیاں، ایہو وجہ سی کہ لوکائی وچ اوہناں دی مقبولیت اندر وادھا ہویا تے اوہناں نے قوم دا دل جت لیا۔ جنرل (ر) راحیل شریف بلا شعبہ اک بہادر خاندان توں تعلق رکھدے نیں تے ایہو وجہ اے کہ بہادری تے دلیری اوہناں دے خون وچ دوڑدی اے۔
اوہناں دے ماموں میجر عزیز بھٹی شہید نے بھارت نال جنگ وچ اجیہی بہادری دا وکھالا کیتا کہ آپ دشمن وی اوہناں دی تعریف کرن اُتے مجبور ہو گئے۔ اوہناں دے وڈے بھرا میجر شبیر شریف شہید نے وی دشمن دے مورچیاں وچ جا کے بہادری دیاں مثالاں قائم کیتیاں۔ اوہناں مگروں جنرل (ر) راحیل شریف نے بطور آرمی چیف آف پاکستان کمان سنبھالی تے دشمناں نال لڑن دے نال نال ملکوں دہشت گردی دے خاتمے لئی عملی اقدامات کیتے جہناں نوں دنیا بھر وچ سلاہیا گیا۔
راحیل شریف دی لوکائی وچ مقبولیت وی کسے توں لُکی ہوئی نہیں سی، اوہناں دی مقبولیت دا اندازا ایس گل توں لایا جا سکدا اے کہ اوہناں دی ملازمت وچ توسیع دے حق وچ وفاقی راجدھانی وچ بینرز تیکر لگے ۔ مشہور کالم نگار ضیاء شاہد نے اپنے کالم وچ ایس بہادر پُتر دی بہادری دا اک واقعہ بیان کردے ہوئے آکھیا کہ راحیل شریف 1981وچ گلگت وچ بریگیڈیئر ہیڈ کوارٹر وچ بطور جی تن تعینات سن۔
راولپنڈی توں گلگت دا سفر بس راہیں طے کرن وچ 24گھنٹے توں ودھ لگدے سن۔ موسمی حالات دی وجہ توں پی آئی اے دے فوکر جہازاں دی آوا جاوی بند ہوندی تے فوجی افسر کسے آؤندے جاندے ہیلی کاپٹر دی اُڈیک وچ رہندے۔ جی ایچ کیو توں اک جنرل ہیلی کاپٹر اُتے گلگت آئے تے واپسی اُتے عملے تے مسافراں توں وکھ دو جوان فوجی افسراں نوں وی ہیلی کاپٹر وچ تھاں مل گئی۔
پیوما ہیلی کاپٹرنے گلگت توں اڈن بھری تے پتن توں پہلاں اوہدے وچ فنی خرابی پیدا ہو گئی۔ فنی خرابی پیدا ہوندے ای پائلٹ نے ہیلی کاپٹر نوں سڑک اُتے لاہ لیا۔ ہیلی کاپٹر دا بوہا کُھلدے ای ساریاں نے چھلانگاں مار کے نسن دی کیتی پر اگے بیٹھے دو جواناں وچوں اک نے باہر نکل کے محفوظ تھاں اُتے جان دا ارادہ کیتا ای سی کہ نال موجود بیٹھے افسر نے اوہدی بانہہ پھڑ لئی تے آکھیاکہ لالے کتھے نس رہیا ایں؟ جہدے اُتے جونیئر افسر نے جواب وچ آکھیا کہ کاک پٹ وچ دھواں بھر رہیا اے جو کسے وی ویلے اگ دا کارن بن سکدا اے۔
جونیئر افسر دی گل سُن کے سینئر افسر نے آکھیا کہ عملے نوں چھڈ کے کس طرحاں جاؤ گے؟ سینئر افسر دی گل سُن کے جونیئر افسر شرمندہ ہو گیا۔ کُجھ دیر بعد ہیلی کاپٹر دے وائرلیس سیٹ دی انٹینا تار توں نکلن والا دھواں بند ہوگیا گیا تے ہیلی کاپٹر مُڑ سفر لئی تیار ہو گیا۔ اپنے کالم وچ اوہناں نے لکھیا کہ ایس سینئر نوجوان افسر دا ناں ’راحیل شریف‘ سی جہناں نے عملے نوں چھڈ کے باہر نکلن توں انکار کر دتا سی۔
