لاہور(پاکستان پوائنٹ نیوز30۔نومبر2017ء) فیض آباد دھرنے خلاف ہفتے نوں اک چینل خاطر سارے ٹی وی چینلز نوں آف ائر کرن دا حکم دتا گیا، پیمرا حکام نوں اہم محکمے دے اہم افسر نے چینل دی بحالی لئی فو ن کیتا، گلاں ودھا چڑھا کے کرن دی وجہ توں چینل نوں 92نمبر اُتے کر دتا گیا ، پیمرا نے بحالی توں انکار کر دتا تے فیر اک حکومتی وزیر تے افسر دی سانجھ نال چینلز بلیک آؤٹ کر دتے گئے۔
میڈیا رپورٹس مطابق قومی اخبار ’جنگ‘ دی رپورٹ مطابق ہفتے دی سویر پونے اٹھ وجے سکیورٹی فورسز ولوں چلائی جان والی پہلی گولی فیض آباد انٹرچینج نوں تحریک لبیک توں خالی کروان لئی آپریشن دے شروعات دی علامت سی۔ ٹی و ی چینلز نے خبر چلانی شروع کر دتی، ایہناں وچوں کُجھ نے جھڑپ نوں ودھا چڑھا کے بیان کیتا۔ کُجھ گھنٹیاں مگروں پیمرا حکام نوں اک اہم محکمے دے اہم افسر ولوں فون کردے ہوئے چینل دی بحالی دا مطالبہ کیتا گیا جہنوں 92نمبر اُتے کر دتا گیا سی۔
پیمرا نے مطالبہ منن توں انکار کیتا۔ ذکر کیتا گیا چینل دھرنا شروع ہون دے دیہاڑے غلط رپورٹنگ کر رہیا سی۔ چینل دی جھیڑوی رپورٹنگ آپریشن دے لانچ ہوندے ای اپنے انبراں نوں پہنچ گئی۔رپورٹ مطابق تحریک لبیک دے اقدامات نوں ایس طرحاں شاندار بنا کے پیش کیتا جا رہیا سی کہ جیویں اوہ اسلام دے سپاہی ہون تے پولیس نوں اِنج پیش کیتا گیا جیویں اوہ عقیدے دا تحفظ کرن والیاں نوں مِدھن والی جابر حکومت ے ایجنٹسن ہون۔
پولیس اہلکاراں نوں ویڈیو وچ دائرا بنا کے پس منظر وچ ترانا چلایا جا رہیا سی جیویں مسلماناں تے غیر مسلماں وچکار جنگ جاری ہوئے۔رپورٹ مطابق پیمرا وی چینل نوں کنٹرول کرن وچ ناکام رہیا تے آخیر پیمرا نے اوہنوں ہیٹھلے نمبراں اُتے گھل دتا، تاں جے اوہدی اعتراض جوگ کوریج نوں گھٹایا جا سکے۔ پر چینل ولوں اوہنوں اوہدی متھی گئی پوزیشن اُتے بحال کرن دا بار بار مطالبہ کیتا گیا۔ پر پیمرا نے جدوں گل نہ منی تے اک افسر نے نویں تجویز دتی۔ رپورٹ مطابق افسر دا کہنا سی کہ جے ذکر کیتے گئے چینل نوں ناظرین تیکر رسائی دی اجازت نہیں دتی جا سکدی تے فیر میڈیا دا مکمل بلیک آؤٹ ہونا چاہیدا۔
