حافظ آباد(پاکستان پوائنٹ نیوز24۔نومبر2017ء) تحریک انصاف دے چیئرمین عمران خان نے آکھیا اے کہ اسحاق ڈار نوں نواز شریف دا راز دار ہون کارن تحفظ حاصل اے، خواجا آصف بارے اگلے ہفتے بہت کُجھ ساہمنے لیاواں گے، شہباز شریف خلاف وی چھیتی کیس لگن والا اے، میر شکیل الرحمن وی نواز شریف نال ہیٹھاں جائے گا، اقتدار وچ آ کے دینی مدرسیاں دے پڑھیاراں دی وی مکمل ذمے واری چُکاں گے۔
اوہناں نے اج حافظ آباد وچ عوامی جلسے نال خطاب کردے ہوئے آکھیا کہ نواز شریف دی اقتدار توں باہر سن تے اک فیکٹری جدکہ اقتدار وچ آن مگروں 30فیکٹریاں بن گئیاں۔ اقتدار وچ آ کے پیسا بنانا، بنکاں توں قرضے لے کے پیسا بنانا آسان ہوندا اے۔ مغرب وچ اقتدار وچ آکے ذات نوں فائدہ نہیں پہنچایا جا سکدا۔ مغرب وچ کوئی وی اقتدار وچ آ کے فائدہ چُکے تے جیل ہو جاندی اے۔
کرپشن نال لوکائی دے ٹیکس دا پیسا لوکائی اُتے خرچ ہون دی بجائے کرپٹ لوکاں دیاں جیباں وچ چلا جاندا اے۔ اوہناں نے آکھیا کہ منی لانڈرنگ دا مطلب چوری دا پیسا ملکوں باہر گھل گھلنا اے۔ ہر سال اک ہزار ارب منی لانڈرنگ کارن باہر چلا جاندا اے۔ ڈالر باہر جاندا اے تے آئی ایم ایف توں قرضے لینے پیندے نیں۔ جدوں ملک مقروض ہو جاندا اے تے ٹیکسز ودھدے نیں تے مہنگائی ودھدی اے۔
