سپریم کورٹ نے پاناما لیکس وچ شامل سارے بندیاں توں تحقیقات کرن بارے جماعت اسلامی دی درخاست سنوائی لئی منظور کر لئی

اسلام آباد(پاکستان پوائنٹ نیوز16۔نومبر2017ء) سپریم کورٹ نے پاناما لیکس وچ شامل سارے بندیاں توں تحقیقات کرن بارے جماعت اسلامی دی درخاست سنوائی لئی منظور کر لئی ‘درخاست اُتے 23نومبر نوں سنوائی ہوئے گی۔ میڈیا رپورٹس مطابق چیف جسٹس آف پاکستان جسٹس ثاقب نثار نے پاناما لیکس وچ شامل سارے بندیاں توں تحقیقات کرن بارے جماعت اسلامی دی درخاست سنوائی لئی منظور کر لئی اے۔

چیف جسٹس آف پاکستان نے سنوائی لئی جسٹس اعجاز افضل دی سربراہی وچ دو رکنی بنچ بنا دتا اے۔ امیر جماعت اسلامی سراج الحق نے پاناما لیکس وچ شامل سارے بندیاں خلاف تحقیقات کروان لئی سپریم کورٹ وچ درخاست دائر کیتی سی۔ درخاست وچ استدعا کیتی گئی سی کہ پاناما لیکس وچ شامل 400توں ودھ بندیاں خلاف کارروائی کیتی جائے۔ یاد رہوے کہ ایس توں پہلاں سپریم کورٹ نے سابق وزیر اعظم نواز شریف تے اوہناں دے خاندان خلاف پاناما کیس دی سنوائی کیتی سی، جہدے وچ نواز شریف نوں نااہل قرار دیند ے ہوئے ہور ٹرائل لئی کیس نیب کورٹ وچ گھل دتا سی۔