لاہور(پاکستان پوائنٹ نیوز13۔نومبر2017ء) مشہور مذہبی سکالر مولانا طارق جمیل دی سابق وزیر اعظم میاں نواز شریف نال ملاقات دی حقیقت ساہمنے آ گئی، مولانا طارق جمیل خلاف سوشل میڈیا اُتے جاری پروپیگنڈا من گھڑت اے، مولانا دا کسے سیاسی جماعت نال کوئی تعلق نہیں‘ نواز شریف ‘ آصف زرداری‘ عمرا خان‘ سراج الحق نال ملنا سیاسی فعل نہیں‘ سبھ رلکے وی مولانا توں اللہ دی دتی ہوئی عزت نہیں کھوہ سکدے۔
میڈیا رپورٹس مطابق مشہور مذہبی سکالر مولانا طارق جمیل دی سیاستداناں‘ اداکاراں‘ کھڈاریاں تے مذہبی جماعتاں دے رہنماواں نال ملاقاتاں بارے اک ویڈیو ساہمنے آئی اے۔ ویڈیو و چ دسیا گیا اے کہ مولانا طارق جمیل اُچے اخلاق دے مالک نیں۔ اوہ کدی گانا وجان والیاں ‘ کھڈاریاں ‘سیاستداناں تے کدی مخالف مسلک والیاں نال ملاقاتاں کردے۔ ویڈیو وچ آکھیا گیا اے کہ اک وار مولانا طارق جمیل نے مولانا مودودی دی تعریف کیتی تے منصورہ وی گئے ‘ایہدے مگروں اوہناں اُتے تنقید کردے ہوئے آکھیا گیا کہ اوہ ویکھو مولانا طارق جمیل گستاخ صحابہ کرام تے خلاف ملوکیت لکھن والے دی تعریف کر رہے نیں۔
مولانا نے کدی سید منور حسن نال محبت دا وکھالا تے کدی سراج الحق لئی شفقت دا وکھالا کیتا۔ ایسے طرحاں مولانا طارق جمیل جدوں مولانا طاہر القادری نال ملے تے ایس موقعے اُتے وی اوہناں نوں تنقید دا ساہمنا کرنا پیا۔
