لاہور(پاکستان پوائنٹ نیوز30۔اگست 2016ء) پاکستان تحریک انصاف دے مرکزی رہنما و سابق گورنر پنجاب چودھری محمد سرور نے آکھیا اے کہ حکومتی ایواناں توں معاشی دہشت گرداں دیاں محفوظ تھاواں ختم کرنیاں ہون گیاں، حکمران عوامی جنون تے اپوزیشن دی تحریک دا سامنا نہیں کر سکن گے۔ تفصیل دے مطابق منگل دے دیہاڑے پاکستان مارچ دے حوالے نال مختلف علاقیاں دے دوریاں دے دوران چودھری محمد سرور نے آکھیا کہ ملک وچ دہشت گردی تے کرپشن دوویں اِکو جہے ناسور بن چکے نیں، سانوں ملک توں ایہناں نوں ختم کرنا ہووے گا جہدے لئی ضروری اے کہ حکومتی ایواناں توں معاشی دہشت گرداں دا وی صفایا کیتا جائے۔
اوہناں نے آکھیا کہ عمران خان نے ایس ملک وچ قوم نوں جو سیاسی شعور دِتا اے اوہدی صرف پاکستان ای نہیں دنیا وچ کوئی ہور مثال نہیں ملدی، ایہو وجہ اے کہ اج قوم تحریک احتساب وچ عمران خان نال کھلوتی اے۔ اوہناں نے آکھیا کہ اسیں پہلے دن توں آکھ رہے آں کہ حکومت مخالف تحریک وچ سولو فلائٹ نہیں کراں گے بلکہ ساریاں اپوزیشن جماعتاں نوں نال لے کے ٹُراں گے، جہدے لئی اسیں (ق) لیگ تے پیپلز پارٹی سنے ہور اپوزیشن جماعتاں نوں احتجاج وچ رلت دی دعوت دِتی اے۔
