اسلام آباد(پاکستان پوائنٹ نیوز08۔نومبر2017ء) سابق وزیر اعظم نواز شریف نال وزیر اعلا پنجاب میاں محمد شہباز شریف نے احتساب عدالت وچ پیشی مگروں ٹیلی فونک رابطہ کیتا اے، رابطے دوران نواز شریف نوں مشورہ دیندے ہوئے شہباز شریف دا کہنا سی کہ سانوں چالو صورتحال وچ صبر تے حکمت عملی توں کم لینا چاہیدا، اداریاں خلاف سخت رویے نال معاملات پدھر نہیں ہون گے۔
تفصیل مطابق بدھ دے دیہاڑے سابق وزیر اعظم میاں محمد نواز شریف نال وزیر اعلا پنجاب میاں شہباز شریف نے احتساب عدالت وچ ہون والی کارروائی مگروں ٹیلی فونک رابطہ کیتا۔ رابطے دوران سپریم کورٹ وچ نظرثانی درخاست سنے احتساب عدالت دے تحریری فیصلے بارے وچار وٹاندرا کیتا گیا۔ ایس موقعے تے شہباز شریف نے وڈے بھرا نوں مشورہ دیندے ہوئے آکھیا کہ سانوں ایس مشکل ویلے وچ صبر توں کم لینا پئے گا کیونکہ اداریاں خلاف سخت رویے نال پہلے ای معاملات خراب ہو گئے نیں۔ نواز شریف نے جواب وچ آکھیا کہ فکر دی کوئی گل نہیں ا ے اسیں عدالتاں وچ اپنے کیس لڑاں گے سانوں اللہ اُتے بھروسہ اے انشاء اللہ سانوں کامیابی ملے گی۔
