اسلام آباد(پاکستان پوائنٹ نیوز29۔اگست 2016ء) وزیر اعظم میاں نواز شریف نے آکھیا اے کہ پاک چین اقتصادی راہداری منصوبے خطے لئی امید دی کرن نیں جو خطے دا مستقبل بدل دین گے۔ تفصیل دے مطابق پیر دے دیہاڑے اسلام آباد وچ اقتصادی راہداری کانفرنس تے ایکسپو دی افتتاحی تقریب نال خطاب دوران وزیر اعظم نواز شریف نے آکھیا کہ گوادر پورٹ تے سی پیک منصوبے مَتھے دا جھومرنیں، بندرگاہ دی اُساری آخری مرحلے وچ اے۔
اوہناں نے آکھیا کہ چین ایکسپریس وے دی اُساری وچ وی تعاون کر رہیا اے، جو گوادر پورٹ نوں نیشنل ہائی وے نال جوڑے گا تے اوہدے اُتے 16 کروڑ 20 لکھ ڈالر لاگت آوے گی۔ وزیر اعظم نے آکھیا کہ گوادر وچ 23 کروڑ الر دی لاگت نال بنن والا بین الاقوامی ائر پورٹ دسمبر 2017 تیکر آپریشنل ہو جاوے گا۔ اوہناں نے آکھیا کہ گوادر نوں ماڈل سمارٹ سٹی وچ بدلن لئی چین نال رلکے ماسٹر پلان اُتے وی کم کر رہے آں۔
اوہناں نے آکھیا کہ خطے وچ استحکام لئی رلکے کم کراں گے، پاکستان نے ہر عالمی فورم اُتے چین دی حمایت کیتی، سی پیک منصوبیاں نال ملک وچ خشحالی آوے گی تے غربت ختم ہووے گی۔ وزیر اعظم دا کہنا سی کہ اقتصادی راہداری دے مغربی روٹ اُتے چالو ورھے کم شروع ہو جاوے گا، منصوبیاں وچ روزگار دے نویں موقعے پیدا ہون گے۔ توانائی دے کوئی منصوبے 2018 وچ مکمل ہو جان گے۔
وزیر اعظم نے آکھیا کہ سی پیک منصوبے وچ 10 ارب رُپئے صرف سڑکاں دا جال وچھان اُتے خرچ کیتے گئے۔ اقتصادی راہداری دے اثرات وسیع تے مستقل نیں۔ اوہناں نے دسیا کہ توانائی دے شعبے وچ 35 ارب ڈالر دی سرمایا کاری کیتی جا رہی اے، پاکستان وچ سکیورٹی دی صورتحال بہت بہتر ہوئی اے۔ پاک چین دوستی دے حوالے نال اوہناں نے آکھیا کہ دوویں ملکاں دے تعلقات باہمی اعتماد تے ایمانداری اُتے مشتمل نیں تے نہایت اہمیت جوگ نیں۔ اوہناں نے آکھیا کہ چین نے ہر مشکل وچ پاکستان دی مدد کیتی تے اسیں وی اقتصادی مشکل وچ چین نوں کَلا نہیں چھڈاں گے۔ اوہناں دا کہنا سی کہ چین دُنیا بھر وچ پاکستان دے تشخص دا دفاع کر رہیا اے۔
