اسلام آباد(پاکستان پوائنٹ نیوز26۔اکتوبر2017ء) سینیٹ دی قائمہ کمیٹی نے پاکستان انٹرنیشنل ائر لائن (پی آئی اے) دا جہاز ویچن دے معاملے اُتے ائر کموڈور (ر) عمران اختر تے ائر لائن دے سابق جرمن سی ای او برنڈ بلڈن برانڈ خلاف تحقیقات دا فیصلا کیتا اے۔ کمیٹی دے اجلاس دوران سینیٹر فرحت اللہ نے آکھیا کہ عمران اختر نے جہاز ویچن دی سمری تیار کیتی پر کمیٹی وچ آکے آکھیا کہ جہاز ویچن دا معاملا اوہناں دے علم وچ نہیں۔
ا وہناں دا کہنا سی کہ پارلیمنٹ ساہمنے غلط بیانی کرن اُتے عمران اختر خلاف تحریک استحقاق وی لیاندی جا سکدی اے۔ سیکرٹری سول ایوی ایشن عرفان الہی نے کمیٹی نوں دسیا کہ ائر کموڈور عمران اختر نوں نوٹس جاری کیتا گیااے پر نوٹس دا اجے تیکر جواب نہیں د تا گیا تے ہن اوہ (ر) ہو گئے نیں۔ ایس موقعے تے فرحت اللہ بابر نے آکھیا کہ پاک فضائیہ دے قانون مطابق ائر فورس دے (ر) افسر خلاف وی تحقیقات ہو سکدیاں نیں۔ قائمہ کمیٹی نے عمران اختر تے برنڈ بلڈن برانڈ خلاف تحقیقات لئی فرحت اللہ بابر دی سربراہی وچ اُچیچی کمیٹی بنا دتی اے، جہنوں معاملے دی ذمے واری عائد کرن دا وی اختیار دتا گیا اے۔
