اسلام آباد(پاکستان پوائنٹ نیوز16۔اکتوبر2017ء) عوامی مسلم لیگ دے سربراہ شیخ رشید نے آکھیا اے کہ عدالتاں اُتے حملے ہو رہے نیں شکر اے ایہ نیب جج نوں نہیں چُک کے لے گئے‘ پوری قوم پاک فوج تے عدالتاں نال کھلوتی اے‘ گینگ فائیو تے اوہناں دے کارندے ماحول نوں خراب کر رہے نیں‘ نواز شریف نوں قومی اداریاں نوں بدنام کرن دا ایجنڈا ملیا اے‘ عمران خان نوں 20اکتوبر نوں پنڈی جلسے وچ رلت دی دعوت دتی اے۔
میڈیا رپورٹس مطابق چیئرمین پی ٹی آئی عمران خان نال شیخ رشید نے اوہناں دے گھر بنی گالا وچ ملاقات کیتی۔ ملاقات دوران ملک دی سیاسی صورتحال بارے وچار وٹاندرا کیتا گیا۔ ایس موقعے تے شیخ رشید نے عمران خان نوں 20اکتوبر نوں پنڈی وچ جلسے اندر رلت کرن دعوت وی دتی۔ ملاقات توں پہلاں اوہناں نے میڈیا نال گل بات کردے ہوئے آکھیا کہ ملک معاشی بدحالی دا شکار اے۔
وزیر اعظم شاہد خاقان عباسی ملک نوں نہیں چلا رہے۔اوہناں دا کہنا سی کہ گینگ فائیو تے اوہناں دے کارندے ماحول نوں خراب کر رہے نیں۔ عدالتاں اُتے حملے ہو رہے نیں۔ شکر اے ایہ نیب جج نوں نہیں چُک کے لے گئے۔ اوہناں نے آکھیا کہ (ن) لیگ جمہوریت نوں ڈی ریل کرن دی کوشش کر رہی اے۔نواز شریف نوں قومی اداریاں نوں بدنام کرن دا ایجنڈا ملیا اے۔شیخ رشید دا کہنا سی کہ پوری قوم پاک فوج تے عدالتاں نال کھلوتی اے۔
