پاکستانی قوم وچ غیرت ہوندی تے اوہناں نال ایہ سبھ نہ ہوندا‘ خشی اے کہ قوم نال ایہ ہو رہیا اے: عائشہ گلا لئی دی جھیڑوی ویڈیو ساہمنے آگئی

پشاور(پاکستان پوائنٹ نیوز06۔اکتوبر2017ء) پی ٹی آئی دی سابق رہنما و عمران خان اُتے الزام لان والی عائشہ گلا لئی دی اک ہور جھیڑوی ویڈیو ساہمنے آ گئی اے۔ ویڈیو وچ عائشہ گلا لئی دا کہنا اے کہ حکمراناں نوں لوکائی دا خیال ای نہیں اے بلکہ جدوں قوم اُتے کوئی وی قدرتی آفت یاں فیر کُجھ ہور ہوندا اے تے ایہ لوک لوکائی اُتے ہسدے نیں کیونکہ ایہناں راہیں ایہ باہروں پیسہ لے کے کھاندے نیں تے اپنیاں جیباں بھردے نیں۔

عائشہ گلا لئی نے ہور آکھیا کہ پاکستانی قوم بہت ای بے غیرت ہو گئی اے ایہناں نوں اپنی حالت اُتے آپ رحم نہیں آؤندا تے حکمران کیویں رحم کھان، پاکستانی قوم ایسے لائق اے کہ ایہدے نال انج ای ہوندا رہوے۔ عائشہ گلا لئی دا کہنا سی کہ جے پاکستانی قوم وچ غیرت ہوندی تے ایہناں نال انج نہ ہوندا، پر مینوں بہت خشی تے اطمینان اے کہ پاکستانی قوم نال ایہ ہو رہیا اے کہ کیونکہ پاکستانی قوم ایسے لائق اے۔