اسلام آباد(پاکستان پوائنٹ نیوز23۔ستمبر2017ء) وزیر اعظم شاہد خاقان عباسی دی تھاں وزیر اعلاپنجاب میاں محمد شہباز شریف نوں وزیر اعظم بنان دی تجویز اُتے اک وار فیر غور شروع کر دتا گیا اے۔ ایس معاملے اُتے وزیر اعظم شاہد خاقان عباسی دی لندن وچ سابق وزیر اعظم میاں نواز شریف نال ہون والی ملاقات دوران وی گل بات کیتی گئی۔تفصیل مطابق شہباز شریف نوں وزیر اعظم بنان دی تجویز اک وار فیر غور ہیٹھ اے تاں جے مسلم لیگ (ن) اندر موجود دھڑے بندی نوں ختم کیتا جا سکے۔
سینیٹ توں پولیٹیکل پارٹیز ایکٹ 2002وچ ترمیم مگروں نواز شریف نوں مسلم لیگ (ن) دا مُڑ صدر چُنیا جائے گا۔ ایس سلسلے وچ اک نجی ٹی وی چینل نے لندن وچ اپنے نمائندے دی رپورٹ وچ دعوا کیتا اے کہ شہباز شریف نوں وزیر اعظم بنان دا معاملا اک وار فیر غور ہیٹھ آیا اے۔ تے اصولی فیصلا کر لیا گیا اے کہ شہباز شریف نوں ای وزیر اعظم بنایا جائے گا۔ ایسے لئی شہباز شریف نوں ہنگامی طور اُتے برطانیہ وچ نواز شریف نے بلایا اے جو کجھ گھنٹیاں مگروں لندن پہنچ گے۔ نجی ٹی وی مطابق ایس معاملے اُتے وزیر اعظم شاہد خاقان عباسی دی لندن وچ سابق وزیر اعظم میاں نواز شریف نال ہون والی ملاقات دوران وی گل بات کیتی گئی۔
