لاہور(پاکستان پوائنٹ نیوز24۔اگست 2016ء) لاہور واسیاں لئی اک خشخبری ایہ اے کہ بسنت منان دا امکان فیر پیدا ہو گیا اے۔ یاد رہوے کہ پہلاں بسنت دوران ممنوعہ دھاگے دی ڈور ورتے جان تے اوہدے پاروں ہون والے حادثیاں نوں مُکھ رکھدے ہوئے بسنت منان اُتے پابندی لا دِتی گئی سی۔ پر ہُن وزیر اعلا پنجاب میاں شہباز شریف نے شہریاں دی فرمائش اُتے سیف بسنت منان لئی کمیٹی بنا دِتی اے۔
ترجمان پنجاب حکومت زعیم قادری نوں ایس کمیٹی دا کنوینز مِتھیا گیا اے۔ جدکہ کمیٹی وچ کمشنر عبداللہ سنبل، سی سی پی او کیپٹن (ر) امین تے ڈی سی او لاہور کیپٹن (ر) محمد عثمان، یوسف صلاح الدین تے صدر کائٹ فلائنگ ایسوسی ایشن شامل نیں۔ کمیٹی نوں سیف بسنت منان دے حوالے نال اپنیاں سفارشاں دو ہفتیاں وچ پیش کرن دی ہدایت کیتی گئی اے۔
