لاہور(پاکستان پوائنٹ نیوز21۔ستمبر2017ء) عوامی تحریک و منہاج القرآن دے سربراہ ڈاکٹر طاہر القادری نے آکھیا اے کہ شہباز شریف نے تواریخ دا بدترین قتلام کروایا۔ شہباز شریف نے 17جون نوں پریس کانفرنس دوران عدالتی کمیشن بنان دا آپ اعلان کردے ہوئے آکھیا سی کہ جے میں ذمے وار ہویا تے استعفا دے دیواں گا۔ تفصیل مطابق لاہور ہائی کورٹ نے عوامی تحریک دی درخاست اُتے ماڈل ٹاؤن دُکھانت دی رپورٹ پبلک کرن دا حکم دے دتا اے۔
ایس حوالے نال پریس کانفرنس کردے ہوئے ڈاکٹر طاہر القادری نے آکھیا کہ میں لاہور ہائی کورٹ نوں تواریخی فیصلا دین اُتے مبارکباد دینا واں تے جسٹس مظاہر علی اکبر دی جرئت نوں اسلام پیش کرنا واں۔ اوہناں دا کہنا سی کہ شہباز شریف نے 17جون 2014نوں تواریخ دا بدترین قتلام کروایا۔ شہباز شریف دی پریس کانفرنس وکھان مگروں طاہر القادری نے آکھیا کہ شہباز شریف نے اوسے دن پریس کانفرنس کردے ہوئے عدالتی کمیشن بنان دا اعلان کیتا اے۔
شہباز شریف دا کہنا سی کہ جے اوہ ذمے وار ہوئے تے استعفا دے دین گے۔ ایہ وی آکھیا گیا سی کہ قاتلاں دی نشان کاری تیکر چین نال نہیں بِہواں گا۔ طاہر القادری دا کہنا سی کہ کُجھ لوک ظالم نوں ظالم آکھن توں کتراندے نیں تے مصلحت دا شکار ہو جاندے نیں۔ اسیں قانون دا ہر بوہا کھڑکایا۔ ماڈل ٹاؤن دُکھانت وچ تن سال توں کوئی گرفتاری نہیں ہوئی۔اسیں ناامید نہیں آں۔
