اسلام آباد(پاکستان پوائنٹ نیوز19۔ستمبر2017ء) قومی اسمبلی وچ قائد حزب اختلاف خورشید شاہ نے آکھیا کہ وزیر اعظم آکھ رہے نیں کہ گھر نوں ٹھیک کرن دی ضرورت اے یقینن اجیہا کُجھ ہے‘ ایہدے نال دشمن ملکاں نوں پاکستان مخالف پراپیگنڈے دا موقع ملیا‘ آرمی چیف نے جمہوریت دی گل کیتی اے جو چنگی گل اے‘ جے پی ٹی آئی کول عددی اکثریت اے تے اپنا اپوزیشن لیڈر لے آئے۔
منگل نوں قائد حزب اختلاف سید خورشید شاہ نے میڈیا نال گل بات کردے ہوئے آکھیا کہ چیئرمین نیب دے معاملے اُتے اپوزیشن نال مشورہ جاری اے تے چیئرمین نیب دے حوالے نال حکومت نال وی اک ملاقات ہوئی اے۔ اوہناں نے آکھیا کہ اپوزیشن جماعتاں توں وی چیئرمین نیب دی تقرری لئی ناں منگے گئے نیں تے وزیر اعظم نوں وی آکھیا گیا اے کہ اوہ نیب چیئرمین لئی اپنے ناواں بارے دسن۔
اوہناں نے آکھیا کہ اوہ چاہندے نیں کہ چیئرمین نیب دے عہدے لئی کسے اجیہے امیدوار دا چناؤ کیتا جائے جو دیانت دار وی ہوئے تے ساریاں لئی قبول جوگ وی۔ خورشید شاہ دا کہنا ہور کہنا سی کہ جے پی ٹی آئی کول عددی اکثریت اے تے اوہ اپنا اپوزیشن لیڈر لے آئے۔ اوہناں نے آکھیا کہ اسمبلی نوں اپنی مدت پوری کرنی چاہیدی۔اوہناں نے آکھیا کہ جے وزیراعظم تے وزیر خارجا آکھ رہے نیں کہ گھر نوں ٹھیک کرن دی ضرور ت اے تے فیر یقینن اجیہا کُجھ ہے پر ایہدے نال دشمن ملکاں نوں پاکستان مخالف پراپیگنڈے دا موقع ملیا اے۔
اوہناں نے آکھیا کہ جے گھر دے حالات اجیہے ای سن تے گل پہلے کیوں نہیں چُکی گئی۔ ایہدا مطلب ایہ اے کہ پہلے نواز شریف ولوں مخالفت سی۔ اوہناں نے آکھیا کہ دہشت گردی دے معاملے اُتے دنیا ساڈا موقف منن نوں تیار نہیں ایہ حکومت دی ناکامی اے جدکہ حقیقت ایہ اے کہ پاکستان اندر دہشت گردی کران والے ملکاں دا رولا دنیا نوں سُنائی دے رہیا اے تے دنیا سُن رہی اے۔
