کراچی(پاکستان پوائنٹ نیوز23۔اگست 2016ء) ایم کیو ایم پاکستان نے الطاف حسین نال لاتعلقی دا اعلان کر دِتا۔ ایم کیو ایم دے رہنما نے منگل دے دیہاڑے پریس کانفرنس کردے ہوئے آکھیا کہ ایم کیو ایم پاکستان الطاف حسین نال لاتعلقی دا اعلان کردی اے۔ اوہناں نے آکھیا کہ ذہنی دباء تے تناؤ وچ جے اِنج ہویا تے بہتر ایہو اے کہ بار بار اِنج نہ ہووے۔اوہناں نے آکھیا کہ ایم کیو ایم دے قائد ولوں بار بار معافی منگی گئی اے ۔
اوہناں نے اعلان کیتا کہ ہُن سارے فیصلے ایم کیو ایم پاکستان کرے گی، ایم کیو ایم پاکستان نوں پاکستان توں آپریٹ ہون دی لوڑ اے۔ اوہناں نے آکھیا کہ میڈیا ہاؤسز اُتے ہون والے حملیاں دی نندیا کردے آں۔ اوہناں نے آکھیا کہ پچھلے دیہاڑے پریس کانفرنس نہ ہون پاروں ساڈا موقف سامنے نہیں آیا۔مینوں کارکناں دے دل جِتن دا موقع نہیں دِتا گیا۔ اوہناں نے آکھیا کہ رینجرز کول ساں ایسے لئی بیان نوں خوف دے نتیجے وچ دِتا گیا بیان سمجھیا جاوے تے اسیں کسے دے دباؤ پاروں پریس کانفرنس نہیں کر رہے۔
اوہناں نے آکھیا کہ اسیں کل ایسے لئی آئے ساں کہ پاکستان مخالف نعریاں بارے لاتعلقی دا وکھالا کر ئیے پر سانوں موقع نہیں دِتا گیا۔ اوہناں نے آکھیا کہ ایم کیو ایم پاکستان دی سیاست کر رہی اے، ایم کیو ایم دے حامی تے ووٹر پاکستان مخالف بیاناں دی مذمت کردے نیں جدکہ ایم کیو ایم پاکستان نوں کمزور تے غیر مستحکم نہیں ہون دے گی۔پریس کانفرنس دوران اوہناں دے نال نسرین جلیل، ارشد وہرہ، خواجا سہیل منصور، ڈپٹی پارلیمانی لیڈر محمد حسین، آصف حسنین تے اقبال محمد علی سنے 12 ارکان اسمبلی وی موجود سن۔
