لاہور(پاکستان پوائنٹ نیوز22۔اگست 2016ء) صوبائی وزیر قانون رانا ثناء اللہ نے آکھیا اے کہ طاہر القادری نوں بھارت ولوں سی پیک منصوبا ناکام بنان لئی پہلی قسط مل گئی اے کیوں جے بھارت سی پیک منصوبے خلاف فنڈز جاری کر رہیا اے۔ پیر دے دیہاڑے پنجاب اسمبلی دے باہر میڈیا نال گل بات کردے ہوئے رانا ثناء اللہ دا کہنا سی کہ لاہور سنے پنجاب دے ہور شہراں وچ بالاں دے اغوا دے حوالے نال کوئی گینگ کم نہیں کر رہیاتے لوکاں نے جہڑے بندیاں نوں تشدد دا نشانا بنایا اوہ سارے بے گناہ نکلے نیں۔
اوہناں نے آکھیا کہ بدقسمتی نال 90 فیصد بال گھردے ماحول تے ماں پیو ولوں تشدد دا نشانا بنائے جان پاروں غائب ہو جاندے نیں جدکہ لاہور وچ اک دن پہلے چار کُڑیاں غائب ہوئیاں تے گھر والیاں نے سڑک بلاک کر دِتی پر اوہ ہُن پتا لگا کہ اوہ آپے ای گھروں گئیاں سن۔اوہناں دا کہنا سی کہ طاہر القادری نوں بھارت ولوں سی پیک منصوبا ناکام بنان لئی پہلی قسط مل گئی اے، کیوں جے بھارت سی پیک منصوبے خلاف فنڈز جاری کر رہیا اے۔
اوہناں عمران خان دے لاہور وچ رینجرز بُلان دے، بیان دے جواب وچ آکھیا کہ عمران خان ہمیشہ احمقانہ گلاں کردے نیں، اوہناں نوں پتا ہونا چاہیدا اے کہ 6 مہینیاں وچ پنجاب وچ اک وی ٹارگٹ کلنگ نہیں ہوئی، صرف اک واقعے نوں جواز بنا کے ای آکھ دینا کہ ٹارگٹ کلنگ ہو رہی اے ، بالکل وی ٹھیک گل نہیں۔ اوہناں دا کہنا سی کہ پہلے دہشت گرد فاٹا توں آوندے سن تے ہُن افغانستان توں آ رہے نیں۔
