اسلام آباد(پاکستان پوائنٹ نیوز19۔اگست2017ء) عوامی مسلم لیگ دے سربراہ شیخ رشید احمد نے نیب وچ حدیبیہ پیپر ملز کیس دا نوٹس گھلن دا اعلان کردے ہوئے آکھیا اے کہ حدیبیہ کیس نواز شریف دی سیاسی موت ثابت ہوئے گا۔ ہفتے نوں پریس کانفرنس کرد ے ہوئے عوامی مسلم (ن) دے سربراہ شیخ رشید نے آکھیا کہ حدیبیہ کیس نواز شریف دی سیاسی موت ثابت ہوئے گا۔ نواز شریف این آر او چاہندے نیں ایس لئی اوہ نیب ساہمنے پیش نہیں ہون گے۔
سپریم کورٹ دے جج خلاف ریفرنس نواز شریف ولوں عدالت خلاف اعلان جنگ اے۔ عوا می مسلم لیگ دے سربراہ نے ڈان لیکس تے جے آئی ٹی رپورٹ دے والیم 10نوں اوپن کرن دا مطالبہ کردے ہوئے آکھیاکہ سپیکر قومی اسمبلی ایاز صادق نوں جاتی امرہ بلا کے ریفرنس دائر کرن دا فیصلا کیتا گیا۔ نواز شریف ہمیشہ قربانی دے بکریاں دا سہارا لیندے نیں تے اوہناں کول اجیہے کئی بکرے نیں۔اوہناں دا کہنا سی کہ نواز شریف نے ایہ فیصلا کر لیا اے کہ اوہناں نے کسے قیمت اُتے وی نیب ساہمنے پیش نہیں ہونا۔
