لاہور(پاکستان پوائنٹ نیوز16۔اگست2017ء) عوامی تحریک دے سربراہ ڈاکٹر طاہر القادری نے حکومت تے تنقید کرد ے ہوئے آکھیا اے کہ اج جمہوریت دی گل، 10ورھیاں تیکر جنرل ضیاء الحق دی جھولی وچ کون بیٹھا رہیا؟جمہوریت نوں پیسیاں نال گندا کیتا گیا، اشرافیہ دا مطلب شریف خاندان دی سلطنت اے، تہاڈا انقلاب نواز ، شہباز بچاؤ انقلاب اے، ماڈل ٹاؤن دُکھانت وچ شریف برادران پھاہے لگن والے نیں۔
اوہناں نے اج فوارہ چوک مال روڈ تے ماڈل ٹاؤن دُکھانت خلاف دھرنے نال خطاب کردے ہوئے آکھیا کہ جسٹس باقر نجفی دے کمیشن دی رپورٹ لین لئی اج دھرنا دتا اے۔ احتجاجی تحریک ختم نہیں ہوئے گی۔ اسیں پرامن ضرور آں پر امن دی کمزوری نہیں۔ ایہ لوک چاہن تے انصاف کھوہ سکدے نیں پر اسیں آئین و قانون نوں نہیں چھڈاں گے۔ اوہناں نے آکھیا کہ یاد رکھو چوڑ پھڑیا گیا اجے قاتل باقی اے جہنے 17جون نوں اپنے حکم نال 14لوکاں نوں قتل کروایا۔
اوس قاتل دا ناں شہباز شریف اے۔ نواز شریف پچھے اصل طاقت شہباز شریف دا اقتدار اے۔ جدوں تیکر ایہ دوویں اپنے انجام نوں پہنچدے ایس ملک توں انھیرے ختم نہیں ہون گے۔ اپنے جھوٹھ دی وجہ توں سپریم کورٹ ولوں نااہل ہون والے نواز شریف آکھدے نیں کہ اوہ آئینی ترمیم کر کے ساہ لین گے۔ اوہ امانت و دیانت دیاں ساریاں شقاں ختم کرنا چاہندے نیں۔
