جاتی امراء(پاکستان پوائنٹ نیوز15۔اگست2017ء) سپیکر قومی اسمبلی سردار ایازصادق نے آکھیا اے کہ نواز شریف نے کسے وی ادارے خلاف گل نہیں کیتی اوہ ہن وی میرے دل وچ وزیر اعظم نیں، ملک دا کونا کونا اوہناں نوں ویکھن لئی اُتاولا اے جدکہ انتخابی اصلاحاتی بل تے بحث جمعرات یاں جمعے نوں ہون دی امید اے۔ اوہناں نے ایہناں خیالاں دا اظہار منگل نوں جاتی امراء وچ نواز شریف دی صدارت ہیٹھ ہون والے مشاورتی اجلاس مگروں پرچا کاراں نال گل بات کردے ہوئے کیتا۔
سپیکر قومی اسمبلی نے آکھیا کہ نااہلی دے معاملے تے جو ہونا سی اوہ ہو گیا ہن سانوں اگانہ ودھنا پئے گا تے اصلاحاتی ایجنڈے نوں عملی جامہ پوانا اے۔ اوہناں دا کہنا سی کہ انتخابی اصلاحاتی بل تے وی جمعرات یاں جمعے نوں بحث شروع ہو جائے گی جو بہت اہم اے۔ سردار ایاز صادق نے آکھیا کہ سابق وزیر اعظم نے ریلی دی صورت وچ صرف اپنے گھر آنا سی۔ اوہناں نے عدالت سنے کسے وی ادارے خلاف کوئی گل نہیں کیتی۔
