اسلام آباد(پاکستان پوائنٹ نیوز10۔اگست2017ء) قومی اسمبلی وچ قائد حزب اختلاف سید خورشید شاہ نے آکھیا اے کہ حکمران غریب لوکائی دا تیل کڈھ کے سِر تے لا رہے نیں پر وال فیر وی نہیں نکلن گے۔ نجی ٹی وی مطابق پبلک اکاؤنٹس کمیٹی دے اجلاس دی صدارت کرد ے ہوئے چیئرمین سید خورشید نے آکھیا کہ ملک اندر 80فیصد ورتیندڑاں دا تعلق غریب طبقے توں اے۔ ایہدے مگروں حکومت 35رُپئے لیٹر والا تیل لوکائی نوں 80رُپئے لیٹر دے رہی اے ۔
خورشید شاہ دا کہنا سی کہ غریب ورتیندڑاں نوں دو رُپئے یونٹ والی بجلی 7رُپئے یونٹ وچ ویچی جا رہی اے جدکہ سی پیک دی سکیورٹی دے ناں تے بجلی ورتیندڑاں توں 17ارب رُپئے لتے جار ہے نیں۔خورشید شاہ دا کہنا سی کہ حکمران غریب لوکائی دا تیل کڈھ کے سِر تے لا رہے نیں پر وال فیر وی نہیں نکلن گے۔ اجلاس وچ وزارت پانی و بجلی دے 2012-13دے 5کروڑ رُپئے توں ودھ دے بقایا پیسیاں دا جائزا لتا گیا۔
آڈٹ حکام نے دسیا کہ اجیہے وڈے نادہندڑاں دے ذمے 246ارب 90کروڑ رُپئے بقایا نیں جو فوت ہو گئے یاں کاروبار بند کر گئے نیں۔ قومی اسمبلی ایم کیو ایم پاکستان دے پارلیمانی لیڈر رشید گوڈیل نے آکھیا کہ تُسیں لوک غریب نوں چھڈدے نہیں جدکہ امیراں دے قرضے معاف کرن لئی اوہناں دا کاروبار بند ہون دا انتظار کردے او۔
