کراچی(پاکستان پوائنٹ نیوز10۔اگست2017ء) پاکستانی مدر ٹریسا ڈاکٹر رُتھ فاؤ بیماری کارن نجی ہسپتال وچ 88سال دی عمر وچ فوت ہو گئیاں۔ تفصیل مطابق پاکستانی مدد ٹریسا ڈاکٹر رُتھ فاؤ کراچی دے نجی ہسپتال وچ دل دے روگ کارن فوت ہوگئیاں نیں۔ ڈاکٹر رُتھ فاؤ 9ستمبر 1929نوں جرمنی دے شہر لیپازگ وچ پیدا ہوئیاں سن جو لمے چِر توں ساہ تے دل دا روگ برداشت کر رہیاں سن۔
ڈاکٹر رُتھ فاؤ نے 1960وچ پاکستان وچ جذام دے خاتمے لئی کوششاں شروع کیتیاں۔ ڈاکٹر رُتھ فاؤ دیاں کوششاں نال پاکستان توں جذام دا خاتمہ ہویا جدکہ عالمی ادارا صحت نے 1996وچ پاکستان نوں جذام تے قابو پان والا ملک قرار دتا۔ پاکستان ایشیاء دا پہلا ملک سی جتھوں جذام تے قابو پایا گیا۔ حکومت پاکستان نے 1979وچ ڈاکٹر رُتھ فاؤ نوں جذام دے خاتمے لئی وفاقی مشیر بنایا تے 1988وچ ڈاکٹر رُتھ فاؤ نوں پاکستان دی شہریت دتی گئی۔ ڈاکٹر رُتھ فاؤ دیاں خدمتاں نوں مُکھ رکھدے ہوئے اوہناں نوں ہلال پاکستان، ستارہ قائد اعظم، ہلال امتیاز، جناح ایوارد تے نشان قائد اعظم نال نوازیا گیا۔
