اسلام آباد(پاکستان پوائنٹ نیوز27۔جولائی 2017ء) وفاقی وزیر داخلا چودھری نثار علی خان نے پاناما لیکس تے سپریم کورٹ دے فیصلے مگروں وزارت تے قومی اسمبلی توں استعفا تے سیاست چھڈن دا اعلان کر دتا۔ اسلام آباد وچ پریس کانفرنس کردے ہوئے اوہناں نے آکھیا کہ سیاست نوں گالھ بنا دتا گیا اے۔ رومی شہنشاواں وانگ وزیر اعظم نوں خوشامدیاں نے گھیریا ہویا اے۔
کابینا دیاں حساس ترین اطلاعواں لیک کیتیاں جاندیاں نیں۔ میرے سنے چار لوک جاندے نیں کہ ملک ایس ویلے ڈاڈھے خطریاں وچ اے۔ میں حساس معاملات تے گل نہیں کر سکدا۔اوہناں نے وزیر اعظم نوں مخاطب کردے ہوئے آکھیا کہ جے سپریم کورٹ دا فیصلا تہاڈے حق وچ آیا تے تہانوں پیر زمین تے رکھنے پین گے‘ بہت سارے لوک تہانوں مشورا دین گے کہ فلاں نوں لٹکا دیو‘ فلاں نوں نسا دیو پر اوس ویلے تہانوں سبھ برداشت کرنا پئے گا تے فیصلا خلاف آن دی صورت وچ تہانوں وڈے دل نال اوہنوں قبول کرنا پئے گا کیونکہ ملک کسے انتشار نوں نہیں سِہ سکدا۔
چودھری نثار علی خان نے آکھیا کہ میں گالھاں کڈھن والیاں توں گِلا نہیں کردا جاندا واں کہ اوہناں نوں کون چلا رہیا اے کیونکہ میاں نواز شریف دا تے ایہ مزاج نہیں۔ اوہناں نے آکھیا کہ اوہ بہت اہم فیصلے کر چکے سن تے اوہناں دا ای پریس کانفرنس وچ اعلان کرنا سی۔
