اسلام آباد(پاکستان پوائنٹ نیوز26۔جولائی 2017ء) وزیر اعلا پنجاب شہباز شریف نے وزیر داخلا چودھری نثار نال پنجاب ہاؤس وچ ملاقات کیتی۔ ملاقات دوران اوہناں وزیر داخلا توں پارٹی اختلافات میڈیا تے نہ لیان دی درخاست کیتی اے۔ بدھ دے دیہاڑے وزیر اعلا پنجاب شہباز شریف وزیر داخلا چودھری نثار نال ملاقات لئی پنجاب ہاؤس گئے۔ وسیلیاں مطابق ملاقات دوران شہباز شریف نے چودھری نثار نوں پارٹی اختلافات میڈیا تے نہ لیان دی درخاست کردے ہوئے آکھیا کہ پہلے وانگ معاملات بِہ کے حل کیتے جان۔
وسیلیاں مطابق ایس موقعے تے شہباز شریف نے چودھری نثار علی خان نوں آکھیا کہ تُسیں پارٹی دے اہم رکن او تے پارٹی لئی تہاڈیاں خدمتاں سلاہن جوگ نیں۔ اوہناں دا کہنا سی کہ وزیر داخلا نے لاہور دھماکے مگروں سیاسی معاملات نوں اک پاسے رکھ کے عقلمندی دا وکھالا کیتا۔ ایس موقعے تے چودھری نثار دا کہنا سی کہ میرے اختلافات اصولی نیں۔میں اپنی ذات لئی نہیں بلکہ پارٹی تے ملکی مفاد وچ گل کرنا واں، میں کدی ذات لئی نہیں سوچیا بلکہ صرف پارٹی و ملکی مفاد نوں ای اہمیت دتی ایس لئی ہن حالات جس تھاں پہنچ گئے نیں اوہدے تے میں ضمیر نوں نہیں ویچ سکدا۔
وسیلیاں مطابق دوویں رہنماواں وچکار لاہور دھماکے سنے ملک دی مجموعی سیاسی صورتحال بارے وی گل بات ہوئی۔ایس موقعے تے وفاقی وزیر خزانا اسحاق ڈار، دفاعی وزیر خواجا آصف تے سعید رفیق وی موجود سن۔
