اسلام آباد(پاکستان پوائنٹ نیوز26۔جولائی 2017ء) پاکستان پیپلز پارٹی دے سینئر رہنما و سینیٹر اعتزاز احسن نے آکھیا اے کہ ظفر حجازی سلطانی گواہ بن سکدا اے، اوہدی جان نوں خطرا اے ، تحفظ دتا جانا چاہیدا، شریف برادران دا وطیرا اے کہ غلاماں وانگ اوہناں دی خدمت کیتی تے ہر کوئی اوہناں اگے کنبدا رہوے، ظفر حجازی نوں ہور لوکاں وانگ قربانی دا بکرا بنایا گیا۔
نجی ٹی وی نال گل بات کردے ہوئے سینیٹر اعتزاز احسن نے آکھیا اے کہ ریکارڈ ٹمپرنگ کیس وچ ظفر حجازی نال نواز شریف نوں ضرور نامزد ہونا چاہیدا سی کیونکہ ظفر حجازی نے جو کیتا اوہدا فائدا نواز شریف نوں ہویا۔ اوہناں نے آکھیا کہ ظفر حجازی دی جان نوں خطرا اے اوہنوں تحفظ ملنا چاہیدا کیونکہ اوہ شریف خاندان خلاف سلطانی گواہ بن سکدا اے۔ اوہناں نے آکھیا کہ شریف برادران چاہندے نیں کہ ہر کوئی اوہناں اگے کنبدا رہوے۔
اوہناں نے آکھیا کہ ماڈل ٹاؤن و چ پولیس افسراں نوں قربانی دا بکرا بنایا گیا اے۔ ظہیر الاسلام خلاف مشاہد اللہ نوں بنایا گیا، ڈان لیکس وچ وی قربانی دے بکرے بنائے گئے، ایس ای سی پی دے چیئرمین ظفر حجازی نوں وی قربانی دا بکرا بنایا گیا۔ ریکارڈ ٹمپرنگ کیس وچ صحیح کارروائی نہیں ہو رہی۔ اوہناں نے آکھیا کہ نیشنل بنک نوں ٹریٹرری آف پاکستان وی آکھیا جاندا اے۔ نیشنل بنک دی اہمیت سٹیٹ بنک جہی اے۔ شریف برادران دا خاص بندا نیشنل بنک دا صدر اے۔ اوہناں نے آکھیا کہ وزیر اعظم یاں وزیر کول اقامے ہونا گھٹیا حرکت ا ے جدکہ وزیر اعظم دا باہرلے ملک نوکری کرنا شرمناک اے۔
