کراچی(پاکستان پوائنٹ نیوز26۔جولائی 2017ء) ترجمان رینجرز سندھ کرنل قیصر خٹک نے آکھیا اے کہ سوشل میڈیا راہیں پاکستان مخالف مواد دی تشہیر کیتی جا رہی اے، ملزم کراچی وچ خفیہ طور تے بانی ایم کیو ایم دے حق وچ وال چاکنگ کر رہے سن۔ بانی ایم کیو ایم نے ملزماں نوں ٹارگٹ کلنگ تے مبارکباد دا پیغام گھلیا، بانی ایم کیو ایم دی مبارکباد دی آڈیو ریکارڈنگ وی سنائی گئی، محب وطن کراچی دے لوکاں شرپسنداں نوں رد کر دتا اے۔
اوہناں اج کراچی ہیڈ کوارٹر وچ پریس کانفرنس کردے ہوئے آکھیا کہ ایم کیو ایم لندن دے 2موٹر سائیکل سوار ٹارگٹ کلرز نوں گرفتار کیتاگیا، ملزماں نوں جنوبی افریقا توں فنڈنگ لئی میسج وی ملیا ہویاسی۔ گرفتار ملزم محمد رحیم تے محمد دانش شامل نیں۔ اوہناں دا کہنا سی کہ 17جولائی نوں کورنگی وچ 2بندیاں نوں ہلاک کیتا۔ ایہناں ملزماں دا تعلق وی ایم کیو ایم لندن توں اے۔ اوہناں نے آکھیا کہ اک ویلا سی کہ بانی ایم کیو ایم دی اک کال تے کراچی بند ہو جاندا سی تے لاشاں ڈگائیاں جاندیاں سن پر کراچی دے بہادر لوکاں نے اوہناں نوں رد کر دتا۔
