لاہور(پاکستان پوائنٹ نیوز25۔جولائی 2017ء) دھی دے ویاہ دی شاپنگ لئی جان والے میاں بیوی وی آپ مارو دھماکے کارن ہلاک ہو گئے۔ والٹن دا رہائشی نیامت تے اوہد ی بیوی شہزادی بی بی اچھرا بازار توں شاپنگ کرن لئی گھروں نکلے سن۔ اوہناں دے پُترعثمان نے دسیا کہ میں دُکان توں گھر واپس آ یا تے بھیناں نے پُچھیا بھائی فیروز پور روڈ کتھے اے؟ جہدے تے میں سوال کیتا اوتھے کیہ ہویا اے میرے بار بار پُچھن مگروں اوہناں آکھیا کہ امی تے ابو شاپنگ کرن گئے نیں اوہ فیروز پور روڈ ای اے تے اوہدے نال ای اوہناں نے رونا شروع کر دتا۔
عثمان دا کہنا سی کہ جدوں میں ٹی وی ویکھیا تے آپ مارو ھماکے دی خبر چل رہی سی جہدے تے میں اپنے کزن نوں نال لیا تے اپنے امی ابو دی بھال وچ نکلے ای ساں کہ پولیس والے مینوں جناح ہسپتال لے گئے جتھے ڈیڈ ہاؤس وچ دوواں دیاں لاشاں پئیاں سن۔ عثمان نے آکھیا کہ میں گھروں نکلدے ہوئے اپنی امی نوں سلام کر کے نکلدا سی تے جدوں تیکر اوہ جواب نہیں دیندی سی میں پیار نال بار بار سلام کردا سی تے فیر اوہ آکھدی سی جا پُتر خدا دے سپرد۔ عثمان دا ہور کہنا سی کہ میرے ابو مینوں دُکان تے چھڈ کے آؤندے تے لیاندے سن پر اج مینوں اوہناں نوں لیانا پے گیا اے۔
