کراچی(پاکستان پوائنٹ نیوز20۔جولائی 2017ء) اج کل دے دور وچ مرد تے سوانیاں وچ کوئی فرق نہیں رہیا۔ مرد تے سوانیاں زندگی دے ہر شعبے وچ اک دوجے دے موڈھے نال موڈھا جوڑ کے کم کر رہیاں نیں پر پچھلے دِنا ای پیپلز پارٹی دی حکومت دا بے نظیر بھٹو یوتھ پروگرام نوجوان نسل نوں کُجھ بہتا چنگا نہیں لگا۔ پروگرام دے بینر توں جھلکدی مبینہ جنس پرستی نے سوشل میڈیا ورتیندڑاں نوں بے چین کردتا اے۔
سوشل میڈیا ورتیندڑاں دا کہنا اے کہ پیپلز پارٹی دے بے نظیر بھٹو یوتھ پروگرام دے تحت کُڑیاں تے مُنڈیاں لئی مرتب کیتے گئے تعلیمی پروگرامز وچ پرانی سوچ جھلکدی اے جو جنسی سطح تے بے امتیاز دی بدترین مثال اے۔ دی میمن انڈسٹریل اینڈ ٹینیکل انسٹی ٹیوٹ (ایم آئی ٹی آئی) نے بے نظیر بھٹو یوتھ پروگرام وچ مرتب کتیے گئے تعلیمی کورسز دی ٹریننگ دی پیشکش کیتی اے۔ ایہ پروگرام اُچیچا غریب بالاں لئی متعارف کروایا گیا اے تاں جے اوہ ہنر سِکھ کے رزق کما سکن۔ پروگرام دے تحت سوانیاں لئی 8تے مرداں لئی 20پروگراماں دی پیشکش کیتی گئی اے۔ جہدے تے سوشل میڈیا نے ایہنوں تنقید دا نشانا بنایا اے۔
