راولپنڈی(پاکستان پوائنٹ نیوز19۔جولائی 2017ء) تحریک انصاف دے چیئرمین عمران خان نے آکھیا اے کہ نواز شریف نوں آکھنا واں کہ اجے وی ویلا اے استعفا دے دیو، نواز شریف جدہ نہیں اڈیالا جیل جان گے، الیکشن وچ بائیو میٹرک تصدیق ہونی چاہیدی، الیکشن کمیشن دے نویں ممبراں نوں چُنیا جاندا چاہیدا، اوورسیز پاکستانیاں نوں ووٹ دا حق دتا جائے، نگران حکومت مشورے نال بنائی جائے، 1958وچ میرے والد نے سرکاری نوکری چھڈ دتی سی۔
اوہناں نے اج پریس کانفرنس کردے ہوئے آکھیا کہ نواز شریف نوں نااہل ہونا ای اے۔ نواز شریف لوکائی وچ جان تے اوہناں نوں گو نواز گو دا نعرا سُنن نوں ملے گا۔ پاکستان بار کونسل وزیر اعظم دے استعفے لئی باہر نکل آئی اے۔عمران خان نے بھار ت ولوں لائن آف کنٹرول اُتے کیتی جان والی فائرنگ دی نندیا کردے ہوئے آکھیا کہ وزیر اعظم نے ایل او سی دی صورتحال تے کوئی گل نہیں کیتی۔
ایل او سی اُتے جاناں جا رہیاں نیں پر اوہناں نوں کوئی فکر نہیں۔ اوہناں نے آکھیا کہ پاناما کیس ساہمنے آؤندے ای وزیر اعظم نوں استعفا دے دینا چاہیدا سی۔ سپریم کورٹ وچ نواز شریف نوں صفائی دین لئی پنج موقعے ملے۔ حکومت نے کرپشن لُکان لئی جھوٹھ بولیا۔ شریف خاندان نے کاروبار نوں تسلیم کیتا پر منی ٹریل نہیں دتی۔ وزیر اعظم دا بزنس ای کرپشن اے جدکہ کمپنیاں کرپشن دا پیسا ری سائیکل کرن لئی بنائیاں۔
