پشاور (پاکستان پوائنٹ نیوز16۔اگست 2016ء) پاکستان دے شمالی علاقے وچ سیلفی لین دی کوشش وچ 11 ورھیاں دی بالڑی دریا وچ ڈُب گئی جدکہ اوہدے ماں پیو وی اپنی دھی نوں بچاندے ہوئے دریا وچ جا ڈُب گئے۔ تفصیل دے مطابق خیبر پختونخوا توں لنگھن والے کہنار دریا اُتے بیسیان پنڈ دے نیڑے اک سیاحتی مقامی اُتے 11 ورھیاں دی بالڑی سیلفی بناندے ہوئے دریا وچ ڈُب گئی، جدکہ اوہدا ماں پیو اوہنوں بچاندے ہوئے آپ وی دریا وچ کُد پیا پر اوہ وی پانی دی دریا وچ ڈُب گئے۔
مقامی پولیس افسر ارشد خان نے دسیا کہ 11 ورھیاں دی صفیہ عاطف ناں دی بالڑی نے دریا کنڈھے سیلفی لین دی کوشش کیتی جہدے تے اوہدا پیر تِلک گیا تے اوہ دریا وچ جا پئی۔ جدکہ دھی نوں ڈُبدا ویکھ کے صفیہ دی ماں شازیہ عاطف نے وی دریا وچ چھال مار دِتی پر اوہ وی دریا وچ ڈُب گئی، دھی تے بیوی نوں پانی وچ ڈُبدا ویکھ کے صفیہ دے والد عاطف حسین توں وی رہیا نہ گیا تے اوہناں نوں بچان لئی اوہنے وی دریا وچ چھال مار دِتی پر اوہناں دی قسمت وی اوہناں نوں لے ڈبی۔ پولیس افسر دا کہنا اے کہ دھی تے اوہدی ماں دی لاش نوں دریا توں کڈھ لیا گیا اے جدکہ عاطف حسین دی لاش دی تلاش اجے جاری اے۔ جدکہ ہلاک ہون والیاں دا تعلق پنجاب توں دسیا گیا اے جو کہ چھٹیاں لنگھان اوتھے گئے ہوئے سن۔
