اسلام آباد (پاکستان پوائنٹ نیوز16۔اگست 2016ء) دفتر خارجا دے ترجمان نفیس زکریا نے آکھیا اے کہ گوانڈھی ملکاں نال چنگے تعلقات پاکستان دی پالیسی اے، پاکستان تے بھارت وچکار اختلاف دے خاتمے دے نتیجے وچ ای خشحالی ممکن اے، بھارتی وزیر اعظم دا بیان مقبوضہ کشمیر توں توجہ ہٹان دی کوشش اے۔ اک انٹرویو وچ ترجمان دفتر خارجا نفیس زکریانے آکھیا کہ مذاکرات دی دعوت نوں دوجے زاویے نال ویکھنا چاہیدا اے، کیوں جے پاکستان دی ہمیشہ ای ایہ پالیسی رہی اے کہ اوہ اپنے گوانڈھی ملکاں نال چنگے تعلقات رکھے جو خطے وچ امن تے خشحالی لئی بہت ضروری وی اے۔
اوہناں نے آکھیا کہ پاکستان تے بھارت خطے دے اہم ملک نیں تے خشحالی ایسے صورت وچ ممکن اے کہ ایہ دوویں ملک آپس وچ جھیڑے ختم کرن۔ اوہناں دا کہنا سی کہ بھارتی وزیر اعظم نریندر مودی دے بیان دے بعد پاکستان نے بھارت نوں بھرپور انداز وچ جواب دِتا اے کیوں کہ ایہ بیان اوس ویلے سامنے آیا جدوں کشمیر وچ بھارتی فورسز دے ظلماں نال حالات خراب نیں۔ نفیس زکریا نے وزیر اعظم دے مثیر برائے امور خارجا سرتاج عزیز دے بیان دا حوالا دیندے ہوئے آکھیا کہ اوہناں نے بلکل ٹھیک آکھیا اے کہ ایہ بیان کشمیر توں توجہ ہٹان دی کوشش سی۔
