اسلام آباد (پاکستان پوائنٹ نیوز16۔اگست 2016ء) انسداد دہشت گردی دی عدالت دے جج سید کوثر عباس زیدی نے ایم کیو ایم دے رہنما ڈاکٹر عمران فاروق قتل کیس وچ گرفتار 3 ملزماں دے جوڈیشل ریمانڈ وچ ہور 14 دن دی توسیع کر دِتی اے۔ منگل نوں انسداد دہشت گردی عدالت نے عمران فاروق قتل کیس دی سنوائی کیتی ایس دوران ملزم خالد شمیم دے وکیل ذیشان چیمہ ایڈووکیٹ پیش ہوئے پر معظم علی تے محسن علی دے وکیل منصور آفریدی کسے مصروفیت پاروں پیش نہ ہو سکے جہدی وجہ توں عدالت نے ملزماں دے جوڈیشل ریمانڈ وچ 30 اگست تیکر توسیع کردے ہوئے سنوائی ملتوی کر دِتی۔
یاد رہوے کہ ایف آئی اے نے ایم کیو ایم دے سینئر رہنما ڈاکٹر عمران فاروق نوں قتل کرن دے الزام وچ ملزم خالد شمیم، معظم علی تے ملزم محسن علی خلاف مقدما درج کرکے کارروائی شروع کیتی اے۔
