اسلام آباد(پاکستان پوائنٹ نیوز11۔جولائی2017ء) تحریک انصاف دے چیئرمین عمران خان نے مطالبا کیتا اے کہ نواز شریف ای نہیں شہباز شریف، اسحاق ڈار تے ایاز صادق وی استعفا دیوے، شہباز شریف خلاف منی لانڈرر ہون اُتے عدالت وچ درخاست جمع کراواں گے، سپریم کورٹ دے فیصلے دی اُڈیک اے، سڑکاں اُتے لوک کڈھن دی دھمکی نہ دیو۔اوہناں نے پارٹی اجلاس مگروں میڈیا نال گل بات کردے ہوئے آکھیا کہ اج اسیں پاناما جے آئی ٹی رپورٹ دا تفصیلی جائزا لیا اے ۔
اوہناں نے آکھیا کہ وزیر اعظم، وزیر خزانا، سعید انور تے شہباز شریف سبھ منی لانڈرنگ وچ ملوث نیں۔ اسحاق ڈارنے ظفر حجازی نوں تعینات کیتا جدکہ اسحاق ڈار نواز شریف دے فرنٹ مین نیں۔ صرف نواز شریف نہیں بلکہ شہباز شریف تے اسحاق ڈار وی استعفا دیوے۔ لندن وچ التوفیق بنک وچ 80کروڑ رُپئے دی سیٹلمنٹ وچ شہباز شریف دا ناں وی اے جدکہ قطری خط دا تے پورے پاکستان وچ مذاق اُڈایا گیا۔
ہن پتا چل گیا کہ قطری خط فراڈ اے جدکہ دبئی دے محکمہ انصاف نے آکھیا کہ گلف سٹیل وچ پیسہ ای نہیں اے۔ فیر ایہ آکھ رہے نیں کہ مریم نواز بینی فیشل آنر نہیں، ہن تصدیق ہو گئی اے کہ مریم نواز بینی فیشل آنر اے۔عمران خان دا کہنا سی کہ ظفر حجازی نے دستاویزات دی ٹمپرنگ کیتی۔ دبئی دی کمپنی نے دسیا کہ نواز شریف وی تنخاہ لیندا رہیا اے۔ عمران خان نے آکھیا کہ ایہ کہڑے مونہ نال ہن ٹی وی تے آکے بہندے نیں۔
ضمیر ویچن والے لوک نیں جو ٹی وی اُتے بِہ کے آکھدے نیں کہ اسیں رپورٹ نہیں مندے۔ جے آئی ٹی رپورٹ غلط اے۔ قوم ایہناں چار وزیراں دیاں شکلاں ویکھ لوے ایہ سارے مجرم نیں۔اوہناں دا کہنا سی کہ آئی بی وی مجرماں دی مدد کر رہی سی۔ اوہناں نے آکھیا کہ ساری قوم جے آئی ٹی دا شکریا ادا کر رہی اے۔ جے آئی ٹی نے اوہ کم کیتا جو باقی اداریاں نے نہیں کیتا۔
عمران خان نے آکھیا کہ نواز شریف، شہباز شریف تے اسحاق ڈار دا استعفا بتھیرا نہیں بلکہ اوہناں نوں اڈیالا جیل گھلیا جائے۔ جیلاں وچ ایس لئی پایا جائے کہ غریب لوک نکی نکی چوری دے جرم وچ جیل وچ نیں جدکہ وڈے چور باہر نیں۔عمران خان دا کہنا سی کہ ایاز صادق نوں جے اپنی عزت پیاری اے تے استعفا دے دیوے کیونکہ ایاز صادق نے نواز شریف دا ریفرنس نہیں گھلیا بلکہ میرا ریفرنس الیکشن کمیشن نوں گھلیا۔
