اسلام آباد(پاکستان پوائنٹ نیوز07۔جولائی2017ء) وزیر اعظم میاں نواز شریف دا کہنا اے کہ جے آئی ٹی 10جولائی نوں رپورٹ تے اسیں داسو ڈیم دی نینہ رکھاں گے، سازش کرن والیاں وچ آﺅندے ویلے وی الیکشن جِتن دی طاقت نہیں، سازشی کدی دھاندلی تے کدی جے آئی ٹی راہیں لُک کے مقصد حاصل کرنا چاہندے، ایہ بزدلی اے ، میدان وچ آﺅ اسیں تیار آں، اسمان سِر اُتے چکن والیاں نوں دسنا چاہنا واں کہ ہزار وار وی آسمان سِر اُتے چکو اسیں خدمت دا کم جاری رکھاں گے۔
اوہناں نے اج جھنگ دے علاقے حویلی بہادر شاہ پاور پلانٹ دی افتتاحی تقریب نال خطاب کردے ہوئے آکھیا کہ 21مہینے پہلے ایتھے پیلیاں سن پر اج اینا وڈا پلانٹ لگ گیا اے۔ اینے گھٹ ویلے وچ پلانٹ دا اک سیکشن نہیں بندا۔ اج درجناں دے حساب نال بجلی دے منصوے بنائے جا رہے نیں۔ اسیں جو منصوبے لائے اوہناں دے بدلے 700ہزار میگا واٹ بجلی پیدا ہو رہی اے۔ معمولی گل نہیں کہ پاکستان وچ چانن پرت رہیا اے ، پہلاں ایس ملک اندر انھیریاں دا راج سی۔
فیکٹریاں بند ہو رہیاں سن۔ کساناں دے ٹیوب ویل بند ہو رہے سن پر اج خشحالی آ رہی اے۔ وزیر اعظم دا کہنا سی کہ ملک وچ سیاحت دے شعبے وچ وی بڑی ترقی ہوئی اے۔ ٹورازم ودھ رہیا اے۔ پہاڑاں وچ تھاں نہیں لبھ رہی۔ وزیر اعلا گلگت بلتستان تے وزیر اعظم آزادکشمیر دس رہے سن کہ سیر کرن والیاں دا رش لگ گیا اے۔ ایہدا مطلب اے کہ لوکاں دی آمدن ودھ گئی اے۔ اوہناں نے آکھیا کہ پاکستان دا گروتھ ریٹ 5.3فیصد تیکر ودھ گیا اے۔
اگلے سال اسیں 7فیصد توں ایہنوں اگانہ لیجاواں گے۔ ساڈا قوم نال وعدا سی کہ لوڈشیڈنگ ختم کراں گے۔ اسیں وعدا پورا کر رہے آں۔ رہندی سہندی کسر اگلے کُجھ مہینیاں وچ پوری کر دیواں گے۔اپنے خطاب وچ وزیر اعظم دا کہنا سی کہ مخالفاں نوں اینی پیڑ اے کہ پاکستان اندر موٹرویز کیوں بن رہیاں نیں، ملک ترقی کیوں کر رہیا اے؟ ایس موقعے تے وزیر اعظم نے وزیر اعلا پنجاب میاں شہباز شریف، شاہد خاقان عباسی تے خواجا آصف دی وی تعریف کیتی۔ اوہناں دا کہنا سی کہ کُجھ دن پہلے اسیں ساہیوال وچ کوئلے نال بجلی پیدا کرن والے پلانٹ دا افتتاح کیتا۔ جہدے نال 1320میگا واٹ بجلی پیدا ہو رہی اے۔
