اسلام آباد(پاکستان پوائنٹ نیوز04۔جولائی2017ء) مسلم لیگ (ق) دے صدر و سابق وزیر اعظم چودھری شجاعت حسین نے آکھیا اے کہ پاکستان مسلم لیگ انشاءاللہ لوکائی دی پہلاں توں ودھ سیوا کرے گی۔ اوہ (ن) لیگ دے صوبائی رہنما و ضلع مانسہرہ دی مشہور سیاسی و سماجی شخصیت علی اصغر خان آف بٹل دی اپنے ساتھیاں سنے پاکستان مسلم لیگ (ق) وچ رلت دے موقع تے میڈیا نال گل بات کررہے سن۔
علی اصغر خان نے چودھری شجاعت حسین نال اوہناں دی رہائش گاہ اُتے ملاقات کیتی۔ ایس موقعے تے اوہناں پاکستان مسلم لیگ دے مرکزی سینئر نائب صدر، و خیبر پختونخوا و فاٹا دے چیف آرگنائزر اجمل خان وزیر دی موجودگی وچ پارٹی قیادت اُتے بھرپور اعتماد دا وکھالا کیتا۔ اوہناں نے آکھیا کہ پاکستان مسلم لیگ دے دور وچ ہزارہ ڈویژن خاص کر مانسہرہ وچ جو ترقیاتی کم ہوئے تے اکتوبر 2005دے زلزلے دوران جس طریقے نال مشکل گھڑی وچ لوکائی لئی کم کیتا گیا اوہدی مثال نہیں اے۔ایس موقعے تے چودھری شجاعت حسین نے آکھیا کہ ساڈی سیاست دا مقصد غریب تے عام بندے دی خدمت اے۔ اسیں ایسے جذبے نال ہزارہ تے مانسہرہ دی لوکائی دی سیوا لئی وی کم کیتا تے انشاءاللہ آن والے ویلے وچ وی کراں گے۔
