جمشید دستی نال جیل وچ اوہدے گھر والیاں دی ملاقات

جمشید دستی نال جیل وچ اوہدے گھر والیاں دی ملاقات

سرگودھا(پاکستان پوائنٹ نیوز30۔جون2017ء) سرگودھا جیل وچ قید رکن قومی اسمبلی جمشید دستی دے گھر والیاں نے جمعے دے دیہاڑے جیل وچ اوہناں نال ملاقات کیتی۔ ملاقات کرن والیاں وچ اوہناں دا بھرا تے بھین وی شامل سن۔ ایس موقعے تے میڈیا نال گل بات کردے ہوئے اوہناں نے الزام لایا کہ حکومت نے ظلم دی انتہا کردے ہوئے غریب لوکاں دا ساتھ دین اُتے جمشید دستی توں سیاسی انتقام لیندے ہوئے اوہناں خلاف غداری تے دہشت گردی ورگے جھوٹھے تے بے بنیاد مقدمے درج کر کے قید کیتا ہویا اے۔

ایس دوران اوہناں نال ملاقات تیکر نہیں کرن دتی گئی۔ اوہناں نے چیف جسٹس لاہور ہائی کورٹ منصور علی شاہ دا شکریا ادا کردے ہوئے آکھیا کہ اوہناں دے نوٹس لین اُتے ناصرف جمشید دستی نوں ریاستی جبر توں نجات ملی بلکہ سانوں وی اک ہفتے مگروں ملاقات دا موقع ملیا۔ اوہناں نے تحریک انصاف دے قائد عمران خان تے ہور سیاسی رہنماواں دا وی شکریا ادا کیتا جہناں نے ایس سلسلے وچ اہم کردار ادا کیتا۔

ایس توں وکھ ڈسٹرکٹ اینڈ سیشن جج سرگودھا سہیل اکرام نے وی سرگودھا جیل دا دورا کیتا تے جمشید دستی توں اوہناں دے مسئلے پُچھدے ہوئے جیل حکام نوں سختی نال ہدایت کیتی کہ اوہ ایہناں دا خیال رکھدے ہوئے ساریاں بنیادی سہولتاں دی فراہمی نوں یقین بنان ۔ سیشن جج نے اپنے دورا جیل دیاں ساریاں تفصیلاں چیف جسٹس آف لاہور ہائی کورٹ نوں گھلیاں۔