اسلام آباد (پاکستان پوائنٹ نیوز15۔اگست 2016ء) وزیر اعظم نواز شریف دی صدارت ہیٹھ قومی سلامتی دا اجلاس۔ تفصیل دے مطابق پیر دے دیہاڑے وزیر اعظم نواز شریف دی صدارت ہیٹھ قومی سلامتی دا اجلاس ہویا جہدے وچ آرمی چیف جنرل راحیل شریف، مثیر قومی سلامتی ناصر خان جنجوعہ، ڈی جی آئی ایس آئی لیفٹیننٹ جنرل رضوان اختر، وفاقی داخلا وزیر چوہدری نثار علی خان، وفاقی خزانا وزیر اسحاق ڈار، مشیر خارجا سرتاج عزیز سنے ہور رہنماواں نے رلت کیتی۔
اجلاس وچ ملک دی سلامتی دی صورتحال دا جائزا لِتا گیا۔ اجلاس دے اعلامیے مطابق نیشنل ایکشن پلان اُتے عملدرآمد، ملک دی اندرونی سلامتی تے بارڈر منیجمنٹ لئی سول آرمڈ فورسز دے 29 ونگز بنان دا فیصلا کیتا گیا اے۔ نویں ونگز بنان دا مقصد قومی سلامتی، اندرونی سلامتی تے سرحد اُتے انتظامی امور نوں ہور بہتر کرنا اے۔ ایس توں وکھ اجلاس وچ صوبیاں تے انٹیلی جنس اداریاں وچکار انٹیلی جنس شیئرنگ تے مکینزم نوں ہور مضبوط بنان دا فیصلا وی کیتا گیا۔
اجلاس وچ ناں بدل کے کم کرن والیاں کالعدم جماعتاں خلاف وی کارروائی کرن دا فیصلا کیتا گیا اے جدکہ دہشت گرداں دی مالی مدد کرن والیاں خلاف کارروائیاں دا وی فیصلا کیتا گیا۔ اجلاس وچ فیصلا کیتا گیا کہ دہشت گرداں خلاف کارروائیاں لئی صوبیاں نوں ہور پیسے دِتے جان گے تاں جے دہشت گردی خلاف جنگ وچ ہور کامیابیاں حاصل ہو سکن جدکہ اجلاس وچ نیشنل ایکشن پلان اُتے عملدرآمد وچ ہور تیزی لیان دا فیصلا کیتا گیا جہدے لئی ٹاسک فورس جلدی اپنا کم شروع کرے گی۔
نیشنل ایکشن پلان اُتے عملدرآمد دا جائز لین لئی ٹیماں وی بنا دِتیاں گئیاں نیں جہدی سربراہی قومی سلامتی دے مثیر ناصر خان جنجوعہ کرن گے۔ ایس توں وکھ چارے صوبیاں دے آئی جیز نیکٹا، چیف سیکرٹریز تے داخلا سیکرٹری سنے وزیر اعظم آفس دے ایڈیشنل سیکرٹری وی ٹاسک فورس دا حصا ہون گے۔ وسیلیاں دے مطابق وزیر اعظم نواز شریف دی صدارت ہیٹھ اجلاس وچ نیکٹا نوں فعال کرن بارے وی گل بات کیتی گئی تے فیصلا کیتا گیا کہ نیکٹا نوں جلدی فعال کیتا جاوے گا۔ جدکہ اجلاس دوران سائبر کرائم بل بارے وی گل بات ہوئی جہنوں ہور موثر کرن دا فیصلا کیتا گیا اے۔
