اسلام آباد (پاکستان پوائنٹ نیوز15۔اگست 2016ء) ملی عوامی پارٹی دے سربراہ محمود خان اچکزئی نوں الیکشن کمیشن نے پہلی ستمبر نوں سد لیا۔ الیکشن کمیشن پاکستان ولوں محمود خان اچکزئی دی طلبی دا نوٹس وی جاری کر دِتا گیا اے۔ تفصیل دے مطابق الیکشن کمیشن وچ محمود کمال ناں دے بندے نے فوج خلاف جھیڑوے بیان دین تے جھیڑوی تقریر کرن اُتے الیکشن کمیشن وچ درخاست دِتی جہدے وچ محمود خان اچکزئی نوں نااہل قرار دین دا آکھیا گیا اے۔
درخاست وچ شہری نے موقف اختیار کیتا کہ محمود خان اچکزئی نے فوج نوں نشانا بنیایا، آئین دے آرٹیکل 19 دے تحت پاکستان دیاں ہتھیار بند فوجاں اُتے الزام نہیں لایا جا سکدا۔ محمود خان ایس توں پہلے وی اک انٹرویو وچ خیبر پختونخوا نوں افغانستان دا حصا قرار دے چکے نیں۔ درخاست وچ ہور آکھیا گیا اے کہ محمود خان اچکزئی نے ملکی ایکتا نوں نقصان پہنچان دی کوشش کیتی ایس لئی ایہناں نوں نااہل قرار دِتا جاوے۔
چیف الیکشن کمیشن دی سربراہی وچ بنچ نے ایس درخاست دی سنوائی کیتی جتھے درخاست گزار دا موقف سنن دے بعد ہور سنوائی نوں 17 اگست تیکر ملتوی کر کے محمود خان اچکزئی نوں ستمبر دی پہلی نوں الیکشن کمیشن دے دفتر سد لیا گیا اے۔ یاد رہوے کہ کوئٹہ دُکھانت اُتے محمود خان اچکزئی نے قومی اسمبلی وچ گل بات کردے ہوئے پاک فوج تے آئی ایس آئی نوں تنقید دا نشانا بنایا سی۔
