اسلام آباد(پاکستان پوائنٹ نیوز24۔جون2017ء) وزیر اعظم نواز شریف دے داماد کیپٹن (ر) صفدر نے پاناما جے آئی ٹی ساہمنے اپنا بیان ریکارڈ کروا دتا۔ پیشی مگروں میڈیا نال گل بات کردے ہوئے اوہناں دا کہنا سی کہ ساری رات قصہ سُنایا گیا پر سویرے اک بندا پُچھدا کہ زلیخا کُڑی سی یاں مُنڈا؟ اوہناں نے آکھیا کہ جے آئی ٹی نوں سوال باہروں آ رہے سن پر سارے سوالاں دے جواب دتے۔
منی ٹریل وی دیواں گا تے دستاویزات وی۔ اوہناں نے آکھیا کہ سپریم کورٹ دا حکم اے جہناں نے جے آئی ٹی بنائی پر میں اندر دی گل شیئر نہیں کر سکدا۔ اسیں قانون دی پاسداری لئی کھلوتے آں۔ اوہناں دا کہنا سی کہ اسیں 73دے آئین دی حفاظت لئی کھلوتے آں۔ کیپٹن (ر) صفدر نے آکھیا کہ پاناما کیس نواز شریف خلاف نہیں بلکہ پاناما سازش کیس پاکستان خلاف اے۔ ایہ کیس 28مئی نوں پاکستان نوں ایٹمی طاقت بنان والے محسن تے مجاہد پاکستان خلاف اے۔
ایہ کیس گوادر پورٹ بنا کے ملکی تقدیر بدلن والے خلاف اے۔ ایہ کیس اوس بندے خلاف جو چاہندا اے کہ ملک نوں انھیریاں توں کڈھیا جائے۔ بے روزگاری ختم کیتی جائے۔ کیپٹن (ر) صفدر دا کہنا سی کہ ایہناں ساریاں گلاں توں اڈ نواز شریف نے اعلان کیتا اے کہ 2018نوں عوام مہر لا کے فیصلا کرے گی۔ اوہناں سوال کیتا کہ سرے محل تے کارگل دے مجرماں نوں کیوں کوئی نہیں پھڑدا؟ اوہناں نے آکھیا کہ عمران خان تے اوہناں دی لابی پاکستان خلاف کم کر رہی اے۔ عمران خدا لئی نظریا پاکستان خلاف سازشاں نہ کرن۔
