پارا چنار(پاکستان پوائنٹ نیوز23۔جون2017ئ) پارا چنار وچ دو بم دھماکے ہوئے نیں، بم دھماکیاں دے نتیجے وچ 18بندے ہلاک تے 70توں ودھ زخمی ہوگئے، موتاں وچ وادھے دا خدشا ظاہر کیتا جا رہیا اے۔ میڈیا رپورٹس مطابق پولیٹیکل حکام نے دسیا کہ پارا چنار وچ اکبر خان سرائے مارکیٹ نیڑے دو دھماکے ہوئے، دھماکیاں دے نتیجے وچ 18بندے ہلاک تے 70توں ودھ زخمی ہوئے نیں۔
دھماکے مگروں مارکیٹ وچ اگ لگ گئی۔ دھمکیاں دی آواز دور دور تیکر سنی گئی۔ دھماکے مگروں لوک خوف کارن گھراں تے دُکاناں توں باہر نکل آئے۔ سکیورٹی فورسز نے علاقے نوں گھیرے وچ لے کے حادثے والی تھاں توں ثبوت اکٹھے کرنے شروع کر دتے نیں جدکہ علاقے وچ مشتبہ بندیاں دی نگرانی وی سخت کر دتی گئی اے۔ دھماکے والی تھاں اُتے ریسکیو ٹیماں نے امدادی سرگرمیاں شروع کر دتیاں نیں۔
دھماکے والی تھاں اُتے پاک آرمی تے فرنٹیئر کور دے دستے وی موجود نیں۔ ہسپتالاں وچ ایمرجنسی نافذ کر دتی گئی اے جدکہ زخمیاں نوں ہسپتال منتقل کیتا جا رہیا اے۔ میڈیا دیاں اطلاواں مطابق پارا چنار وچ پہلے دھماکے دی آواز سُن کے لوک زخمیاں نوں ریسکیو کر رہے سن کہ دوجا دھماکا ہو گیا۔ پارا چنار دے طوری بازار وچ دھماکا اوس ویلے ہویا جدوں لوک عید دی شاپنگ وچ رُجھے سن۔
