اسلام آباد(پاکستان پوائنٹ نیوز17۔جون2017ء) پاناما کیس دیاں تحقیقات کرن والی جے آئی ٹی نے قطری شہزادے لئی اک سخت سوالناما تیار کرلیا اے۔ تفصیل مطابق وسیلیاں نے دسیا کہ جے آئی ٹی ساہمنے پیش ہون لئی جے قطری شہزادہ حماد بن جاسم الثانی پاکستان آیا تے اوہدا واپس جانا مشکل ہو سکدا اے۔ جے آئی ٹی قطری شہزادے نوں روکن لئی سپریم کورٹ توں درخاست کر سکدی اے۔
چیتے رہوے کہ پاناما لیکس کیس قطری شہزادے دے خط اُتے منحصر اے۔ شریف خاندان دی منی ٹرین نوں ثابت کرن لئی قطری شہزادے دا خط سپریم کورٹ وچ پیش کیتا گیا سی۔ جے آئی ٹی وزیر اعظم نواز شریف، اوہناں دے پُتراں تے وزیر اعلا پنجاب دا بیان ریکارڈ کر چکی اے۔ جے آئی ٹی نوں ہن صرف قطری شہزادے تے اوہناں ولوں پیش کیتے جان والے ثبوتاں تے دستاویزات دی اُڈیک اے۔
قطری شہزادے دی پاکستان ممکنہ آمد نوں مُکھ رکھدے ہوئے جے آئی ٹی نے وی اک سخت سوالناما تیار کر لیا اے۔ ایس سوالنامے دے تحت قطری شہزادے توں شریف خاندان دی منی ٹریل بارے تفصیلاں پُچھیاں جان گیاں۔ قطری شہزادے توں میاں شریف نال کاروبار شروع کرن، کاروبار دی سرمایا کاری تے پیسیاں دی قطر منتقلی بارے سوال کتیے جان گے۔ قطری شہزادے توں کاروبار وچ حصیاں تے شریف خاندان دی ہور سرمایا کاری باری وی پُچھیا جائے گا۔ وسیلیاں نے دعوا کیتا کہ پاکستان آمد اُتے قطری شہزادے لئی واپس جانا مشکل ہو جائے گا۔
