لاہور(پاکستان پوائنٹ نیوز15۔جون2017ء) وزیر قانون پنجاب رانا ثناءاللہ خان نے آکھیا اے کہ وزیر اعظم نے جے آئی ٹی وچ پیش ہو کے خلفائے راشیدین دی پیروی کیتی، واٹس اپ کال دی کہانی لوکائی ساہمنے رکھی جائے گی۔ اوہناں نے وزیر اعظم نواز شریف دی جے آئی ٹی ساہمنے پیشی دے عمل نوں سلاہندے ہوے آکھیا کہ وزیر اعظم نواز شریف نے جے آئی ٹی وچ پیش ہو کے خلفائے راشیدین دیاں روایتاں دی پیروی کیتی اے۔
اوہناں دا کہنا سی کہ وزیر اعظم دی پیشی نال جمہوریت، احتساب تے عدالتاں دی مضبوطی ہوئی۔ رانا ثناءاللہ دا کہنا سی کہ وزیر اعظم نے اج سپریم کورٹ تے اداریاں دی عزت کیتی اے۔ جے آئی ٹی وچ پیشی سپریم کورٹ وچ پیشی دے برابر اے۔ رانا ثناءاللہ نے پاناما جے آئی ٹی نوں تنقید دا نشانا بناندے ہوئے آکھیا کہ جے آئی ٹی پوری دنیا پچھے پے گئی اے۔ 13,13گھنٹے لوکاں کولوں پُچھیا جا رہیا اے۔ جے آئی ٹی دیاں تحقیقات شفاف ہونیاں چاہیدیاں۔ جے آئی ٹی نوں ہن کنٹینرز توں ہیٹھاں آنا چاہیدا۔ اوہناں نے آکھیا کہ ہن جے آئی ٹی وی اپنے آپ نوں احتساب لئی پیش کرے۔ رانا ثناءاللہ دا ہور کہنا سی کہ ہن واٹس اپ کال دی کہانی لوکائی ساہمنے رکھی جائے گی۔
