اسلام آباد(پاکستان پوائنٹ نیوز12۔جون2017ء) تحریک انصاف دے چیئرمین عمران خان دی صدارت ہیٹھ پارٹی دا اعلا سطحی اجلاس ہویا، اجلاس وچ ملک دی سیاسی صورتحال بارے وچار وٹاندرا کیتا گیا۔ میڈیا رپورٹس مطابق عمران خان دی صدارت ہیٹھ اجلاس وچ پاناما کیس تے جے آئی ٹی دی کارروائی بارے وچار وٹاندرا کیتا گیا جدکہ جے آئی ٹی ولوں وزیر اعظم نوں سَدے جان دے معاملے بارے وی گل بات کیتی گئی۔
اجلاس مگروں میڈیا نال گل بات کردے ہوئے عمران خان دا کہنا سی کہ اسیں جے آئی ٹی اُتے اعتماد کیتا اے۔ وزیر اعظم دے استعفے توں بغیر جے آئی ٹی دا آذاد ہو کے کم کرنا ممکن نہیں اے۔ جمعرات توں پہلے نواز شریف نوں استعفا دے دینا چاہیدا۔ اوہناں دا کہنا سی کہ جے آئی ٹی دے کم وچ اوکڑاں پانا وی جرم اے۔ میرا مطالبا اے کہ جے آئی ٹی دی کارروائی نوں پبلک کیتا جائے۔
اوہناں نے آکھیا کہ اک بندے نے سارے ادارے تباہ کر دتے۔ دھاندلی کیس وچ الیکشن کمیشن نے وی جعلی کاغذات بنائے۔ اوہناں نے آکھیا کہ جسٹس عظمت سعید نے آکھیا کہ نیب چوراں نوں بچا رہیا اے۔ سپریم کورٹ دے ریکارڈ وچ ایہ آ گیا اے کہ وزیر اعظم دے ماتحت سارے ادارے احتساب نوں روکن وچ مدد کر رہے سن۔ عمران خان نے آکھیا کہ قطری شزادہ نہ آیا تے کیس ختم ہو جائے گا ایس لئی جے آئی ٹی اُتے حملے کیتے جا رہے نیں۔
ثابت ہو گیا کہ قطری خط جھوٹھ اے۔ عمران خان دا کہنا سی کہ نواز شریف جے آئی ٹی ساہمنے پیش ہو کے احسان نہیں کر رہے اوہ مجرم نیں تے اوہناں دی وجہ توں ای ملک مقروض ہو گیا اے۔ اوہناں نے آکھیا کہ دنیا آکھدی ہووے گی کہ اک ملک دے وزیر اعظم خلاف کریمنل کیس وچ تحقیقات ہو رہیاں نیں پر اوہ دنیا دے چکر لا رہیا اے۔ اک سوال دے جواب وچ اوہناں دا کہنا سی کہ مینوں نہیں پتا کہ مولانا صاحب واپس آ گئے نیں، اوہناں دا سنجیدا کیس اے۔ ماڈل ٹاﺅن واقعے دی رپورٹ نوں پبلک ہونا چاہیدا۔
