شریف برادران باکل مافیا نیں، پر ججاں نوں ایس طرحاں دے بیان نہیں دینے چاہیدے: اعتزاز احسن

اسلام آباد(پاکستان پوائنٹ نیوز02۔جون2017ء) پاکستان پیپلز پارٹی دے رہنما اعتزاز احسن نے آکھیا اے کہ شریف برادران بالکل مافیا نیں پر ججاں نوں ایس طرحاں دے بیان نہیں دینے چاہیدے۔ پارلیمنٹ ہاﺅس باہر میڈیا نال گل بات کردے ہوئے اعتزاز احسن نے آکھیا کہ نہال ہاشمی وچ نواز شریف بولدا اے، نہال ہاشمی دا بیان سپریم کورٹ اُتے لفظی حملا سی ایہ تے پہلے وی حملا کر چکے نیں، سپریم کورٹ اُتے حملا کرن والے اج سینئر وزیر بنے بیٹھے نیں جے نواز شریف وزیر اعظم رہے تے دو سال وچ نہال ہاشمی نوں گورنر لا دین گے۔

اعتزاز احسن نے آکھیا کہ شریف برادران بالکل مافیا نیں، اوہناں دا کسے توں گزاراہ ہو ای نہیں سکدا، اوہ ایس نظام دے لاڈلے تے وگڑے ہوئے بال نیں۔ اوہناں دا کہنا سی کہ ایس طرحاں دے ریمارکس ججاں نوں نہیں دینے چاہیدے سن، ایس قسم دے ریمارکس ماحول نوں خراب کردے نیں، ججاں نوں فیصلا لکھنا چاہیدا سی۔ چیتے رہوے کہ نہال ہاشمی دی سپریم کورٹ وچ پیشی دوران فاضل جج نے آکھیا سی کہ آمراں نے وی کدی ساڈے بالاں نوں دھمکیاں نہیں دتیاں، کیہ ایہ حکمران مافیا بن گئے نیں جو بالاں نوں دھمکیاں دے رہے نیں۔