اسلام آباد(پاکستان پوائنٹ نیوز31۔مئی2017ء) الیکشن کمیشن نے توہین عدالت کیس وچ عمران خان ولوں جمع کروایا گیا جواب رد کردے ہوئے جواب مُڑ جمع کروان دا آکھیا اے۔ تفصیل مطابق توہین عدالت کیس دی سنوائی چیف الیکشن کمشنر جسٹس (ر) سردار محمد رضا دی سربراہی وچ 5رکنی بنچ نے کیتی، ایس دوران عمران خان ولوں فواد چودھری پیش ہوئے۔ فواد چودھری دا کہنا سی کہ عمران خان نے جو درخاست جمع کروائی سی اوہ واپس لے لئی اے ایس لئی ایہ توہین عدالت نہیں بندی۔
چیف الیکشن کمشنر نے آکھیا کہ عمران خان نے جو جواب جمع کروایا اے اوہدے وچ معافی تے منگی ای نہیں گئی۔ بعدوں بنچ نے پہلے فیصلا محفوظ کیتا تے فیر فیصلا سناندے ہوئے توہین عدالت کیس وچ عمران خان ولوں جمع کروایا گیا جواب رد کر دتا۔ بنچ نے عمران خان نوں 7جون تک دی مہلت دیندے ہوئے کیس دی سنوائی 7جون تک ملتوی کر دتی۔ ایسے طرحاں پارٹی فنڈنگ کیس دی سنوائی تحریک انصاف دی درخاست اُتے 22جون تیک ملتوی کر دتی گئی۔ پی ٹی آئی ولوں موقف اختیار کیتا گیا کہ سپریم کورٹ وچ وی ایہو کیس سنوائی ہیٹھ اے۔ چیف الیکشن کمشنر نے آکھیا کہ ساڈا تحریک انصاف دے حوالے نال آرڈر اوہو اے کہ اوہ اپنا جواب جمع کروائے پر سپریم کورٹ دی کارروائی ویکھ لیندے آں کہ اوہ کیہ فیصلا کردی اے۔
