اسلام آباد(پاکستان پوائنٹ نیوز30۔مئی2017ء) سپریم کورٹ نے عمران خان دی نااہلی کیس دی سنوائی کل تک ملتوی کر دتی اے۔ میڈیا رپورٹس مطابق اج چیف جسٹس آف سپریم کورٹ دی سربراہی وچ رہنما مسلم لیگ (ن) حنیف عباسی دی درخاست اُتے سنوائی ہوئی۔ ایس موقعے اُتے چیف جسٹس سپریم کورٹ نے ریمارکس دیندے ہوئے آکھیا کہ بنی گالا مُل لین لئی پیسے کتھوں آئے؟ ایہ عمران خان نوں ثابت کرنا پئے گا۔
چیف جسٹس دا کہنا سی کہ نعیم بخاری نے آپ ادائیگیاں تیجے فریق راہیں ہون بارے آکھیا، تے ہن ایہناں نے ایس گل دا دفاع کرنا اے، نہ کر سکے تے اوہدا نتیجہ بھگتنا پئے گا، جے گفٹ دتا اے تے فیر ٹیکس کیوں دیندے رہے؟ بخاری صاحب تہانوں منی ٹریل ثابت کرنا پئے گا۔ وکیل عمران خان نعیم بخاری نے اپنے دلائل وچ آکھیا کہ جمائمہ نے بنی گالا دی تھاں عمران خان نوں گفٹ کیتی تے ایس حوالے نال ٹیکس وی دتا۔نعیم بخاری دا کہنا سی کہ عمران خان نوں جمائمہ خان نے بنی گالا زبانی گفٹ کیتا، کسے تیجے نوں ایہدے اُتے کیہ اعتراض ہو سکدا اے۔ اوہناں نے آکھیا کہ باقی دلائل کل تیک مکمل کر لواں گا۔
