(پاکستان پوائنٹ نیوز29۔مئی2017ء) اُسامہ بن لادن دے سبھ توں نِکے پُتر نے والد دے نقش قدم اُتے چلن دا اعلان کر دتا۔ تفصیل مطابق سوشل میڈیا اُتے 28ورھیاں دے حمزہ بن لادن دی اک آڈیو سوشل میڈیا اُتے جاری کیتی گئی اے جہدے وچ حمزہ نے اپنے سارے منن والیاں نوں ہدایت جاری کیتیاں۔ ذکر کیتی گئی آڈیو وچ آکھیا گیا کہ کافراں اُتے مسلط ہون دی تیاری کیتی جائے۔
ایس آڈیو نوں مانچسٹر دھماکے توں پہلے جاری کیتا گیا سی جہدے وچ شامی بالاں دے قتلام دا بدلا لین لئی امریکا تے یورپ اُتے حملے کرن دا آکھیا گیا۔ حمزہ بن لادن نوں اپنے والد دی موت دا بدلا لین لئی وی چُکیا گیا سی۔ حمزہ نوں 2015وچ اک آڈیو پیغام راہیں کالعدم تنظیم دے چیف ایمان الزواہری نے متعارف کروایا سی۔ حمزہ دا کہنا سی کہ شامی، افغانی، فلطسینی، عراقی، یمنی تے صومالی قوماں اُتے ظلم کرن دی وجہ توں اسیں سارے ملکاں نوں نشانا بناواں گے۔
حمزہ نے آڈیو پیغام وچ آکھیا کہ ایہ بدلا صرف اُسامہ دی موت دا نہیں بلکہ اوہناں سارے لوکاں دی موت دا اے جہناں نے اسلام دا دفاع کیتا۔ واشنگٹن پوسٹ مطابق ایس نویں آڈیو توں صاف پتا چلدا اے کہ ایس تنظیم وچ تبدیلی آئی اے۔ حمزہ 9/11دے حملے توں پہلے افغانستان وچ اپنے والد نال رہیا تے اوہدے مگروں وی امریکی فورسز دے حملے تیک پاکستان وچ اپنے والد نال رہیا۔
