بدعنوانی تے کرپشن نال نبڑاں گے: چیئرمین نیب

اسلام آباد(پاکستان پوائنٹ نیوز27۔مئی2017ء) قومی احتساب بیورو(نیب) دے چیئرمین قمر زمان چودھری نے آکھیا کہ بدعنوانی تے کرپشن نال نبڑاں گے، نیب منصوبا بندی کمیشن نال رلکے 11ویں 5سالہ منصوبے دے تحت بدعنوانی دے ٹارگٹ حاصل کرن لئی سرگرم اے۔ نیب ہیڈ کوارٹر وچ 15دِنا جائزا اجلاس دے رلتیاں نال خطاب کردے ہوئے چیئرمین نیب نے آکھیا کہ نیب چیئرمین دیاں ذمے واریاں سنبھالن مگروں بدعنوانی ورگے مسئلے اُتے قابو پان لئی کم جاری اے، جہدے تحت پہلے مرحلے وچ شکایتاں دی تصدیق تے فیر انکوائری مگروں تحقیقات کیتیاں جاندیاں نیں۔

اوہناں نے آکھیا کہ پچھلے ورھے دے آنکڑیاں توں ایہ گل ثابت ہوئی اے کہ نیب دے سارے عملے نے رلکے سخت محنت نال کم کیتا اے تے کرپشن دے خاتمے نوں اک قومی فرض سمجھ کے کردار ادا کیتا اے۔ اوہناں نے آکھیا کہ شکایتاں دی وصولی وچ ہون والا وادھا نیب اُتے لوکائی دے ودھدے ہوئے اعتماد دا وکھالا اے۔